ވިލިނގިލީ ފާމަސީއެއް ފަޅާލައި، އަމަލުވާ ޒާތުގެ ބޭސްތަކެއް ވަގަށް ނަގައިފި
ގއ. ވިލިނގިލީ އެސްޓީއޯ ފާމަސީ ފަޅާލައި، އެތަނުގައި ހުރި އަމަލުވާ ޒާތުގެ ބޭސްތަކެއް ވަގަށް ނަގައިފި އެވެ.
އެނގިފައިވާ ގޮތުގައި ފާމަސީ ފަޅާލާފައި ވަނީ، ރޭގެ ވަގުތެއްގައެވެ.
އޮންލައިން ނޫސް "ސަން" އިން ބުނެފައިވަނީ ފާމަސީ ފަޅާލާފައި ވަނީ އެތަނުގެ ބިއްލޫރި ގަނޑު ތަޅާލައިގެން ކަމަށާއި އެތަނަށް އެކިވަރުގެ ގެއްލުންތަކެއް ދީފައިވާ ކަމަށް ވިލިނގިލީ އެސްޓީއޯ ފާމަސީ މެނޭޖަރު އިސްހާގު ނިޒާރު އެނޫހަށް މައުލޫމާތު ދެއްވަމުން ވިދާޅުވި ކަމަށެވެ.
"ކޮންޓްރޯލް ބޭސްތަކެއް މަދުވޭ. ދެން ކޮންމެވެސް ވަރަކަށް ވަތްގަނޑުގައި ހުރި ފައިސާތައް ވެސް ވަނީ ނަގާފައި،" އިސްހާގު ވިދާޅުވެފައިވެއެވެ.
މިމައްސަލަ އިތުރަށް ތަހުގީގު ކުރަމުންދާތީ މަދުވާ ބޭހާއި ފައިސާގެ އަދަދު އަދި ކަށަވަރު ނުވާ ކަމަށް ވެސް އިސްހާގު ވިދާޅުވެފައިވެއެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވީ ފާމަސީ ފަޅާލައި ވައްކަކުރި މައްސަލަ މިއަދު ހެނދުނު 8:02 ގައި އެ މުއައްސަސާއަށް ހުށަހަޅާފައިވާ ކަމަށެވެ. އަދި އެ މައްސަލަ މިހާރު ތަހުގީގު ކުރަމުން އަންނަ ކަމަށް ވެސް އޮފިޝަލު ވިދާޅުވިއެވެ.
އެކަމާއި ގުޅޭ އިތުރު ތަފްސީލެއް އަދި ލިބިފައެއް ނުވެއެވެ.
