އިމްރާނަށް ކުރަމުންދާ ތުހުމަތުތަކަށް ޖަވާބުދާރީވާން ޖެހޭ: އާދަމް ޝަރީފް
ހޯމް މިނިސްޓަރު އިމްރާން ޢަބްދުﷲ ގެ މައްޗަށް ކުރަމުންދާ، އަންހެނަކަށް ޖިންސީ ގޯނާ ކުރިކަމުގެ ތުހުމަތުތަކަށް ޖަވާބުދާރީ ވާން ޖެހޭނެ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އަދި ކުރީގެ ޑިފެންސް މިނިސްޓަރު އާދަމް ޝަރީފު އުމަރު ވިދާޅުވެއްޖެއެވެ.
ހޯމް މިނިސްޓަރު އިމްރާން ގެ ފަރާތުން ޖިންސީ ގޯނާ ލިބުނު ކަމަށް ބުނާ އަންހެން މީހާ ފުލުހުންގެ ވަޒީފާ އިން މިއަދު ވަނީ ވަކިކޮށްފައެވެ. އެނގިފައިވާ ގޮތުގައި އެއަންހެންމީހާ ފުލުހުންގެ ސިވިލް ބައިގައި މަސައްކަތް ކުރަމުން ދިޔަތާ ވަރަށް ގިނަ އަހަރުތަކެއް ވެފައިވެއެވެ.
މިކަމާއި ގުޅޭގޮތުން މިއަދު އާދަމް ޝަރީފު ކުރެއްވި ޓްވީޓެއްގައި ވިދާޅުވެފައި ވަނީ މިނިސްޓަރ އިމްރާން ގެ މައްޗަށް އެތައް ތުހުމަތުތަކެއް ކުރަމުންދާއިރު އެކަމަށް އެމަނިކުފާނު ޖަވާބުދާރީ ވާން ޖެހޭނެ ކަމަށެވެ.
"އަދި މިމައްސަލައިގެ އިންސާފު ހޯދައިދޭން ޖެހޭ، ޕީޕީއެމް ގެ ވެރިކަމެއްގައި އެކަން ކުރާނަން" މެންބަރު އާދަމް ޝަރީފު ވިދާޅުވިއެވެ.
ހޯމް މިނިސްޓަރު އިމްރާން ގެ ފަރާތުން ޖިންސީ ގޯނާ ލިބުނު ކަމަށް ބުނެ، އެއަންހެން މީހާ އިމްރާނާ މަގުމަތިން ފުރައްސާރަ ކުރިކަން ވަނީ މީޑީއާ ގެ ސަމާލު ކަމަށް ވެސް އައިސްފައެވެ.
