މެލޭޝިއާގެ މުސްލިމުން “ހަލާލް” ޖެހި އޫރު މަސް ކާތާ 40 އަހަރު ވެއްޖެ!

މެލޭޝިއާގެ މުސްލިމުން “ހަލާލް” ޖަހައިފައިވާ އޫރު މަސްތަކެއް ކާތާ 40 އަހަރު ވެއްޖެއެވެ.

Ads by Sosun Fihaara

އެގައުމުގެ މުސްލިމުން އެމަސް ކަމުން އައީ ނޭނގުމެއްގެ ތެރޭގައެވެ. ބޭރުގެ ނޫހެއް ކަމަށްވާ “ނިއު ސްޓްރެއިޓްސް ޓައިމްސް” އިން ބުނެފައިވާ ގޮތުގައި، އެގައުމަށް އޭގެ “ފޭކް ހަލާލް” ޖެހިފައިވާ ޕެކެޓުތަކުގެ ކޮންޓެއިނާ އެތެރެ ކޮށްފައި ވަނީ އެގައުމުގެ ސަރުކާރުގެ އޮފިސަރުން ރިޝްވަތު ނަގައިގެންނެވެ.

އެގޮތުން އެގައުމަށް އެތެރެ ކުރާ ކޮންމެ ކޮންޓެއިނަރަކަށް ޔޫއެސް ޑޮލަރުގެ 36 ޑޮލަރާއި 738 ޑޮލަރާ ހަމައަށް އެގައުމުގެ ސަރުކާރުގެ އޮފިސަރުންގެ ޖީބަށް ވަންނަ ކަމަށް އެ ނިއުސްގައި ބަޔާން ކޮށްފައި ވެއެވެ. ހަމައެކަނި ރުފިޔާއަކަށް ނޫން ކަމަށާއި، ބައެއް ފަހަރު ސަރުކާރުގެ އޮފިސަރުންގެ ޖިންސީ އެދުން ފުއްދުމަށް އަންހެނުން ވެސް ރިޝްވަތުގެ ގޮތުގައި ނަގާ ކަމަށް އެ ޚަބަރުގައި ވެއެވެ.

އެ ޕެކޭޖުތައް މެލޭޝިއާއަށް އެތެރެ ވާއިރު “ހަލާލް” ޓެގު ނީންނަ ކަމަށާއި އެގައުމަށް އެތެރެ ވާހިސާބުން ފެށިގެން ވެއާ ހައުސްއަކަށް ގެންގޮސް “ފޭކް ހަލާލް” ޓެގު ހަރު ކުރާ ކަމަށް ޚަބަރުތަކުން މައުލޫމާތު ލިބެއެވެ. އަދި މިގޮތަށް އެގައުމުގެ މުސްލިމުންނަށް “ފޭކު ހަލާލް” ޓެގުގައި ހުންނަ ޕެކޭޖުތައް ކާން ދޭތާ މިހާރު 40 އަހަރު ވަނީ ވެފައެވެ.

މިކަމާ ގުޅިގެން މެލޭޝިއާގެ މުސްލިމުން އަންނަނީ ކަންބޮޑުވުންތައް ފާޅު ކުރަމުންނެވެ. އަދި އެފަދަ ޕެކޭޖެއް ގަތުމުގައި ދެން އެއްވެސް ފަރާތަކަށް އިތުބާރު ކުރަން ޖެހިލުން ވާނެ ކަމަށް ވެސް އެގައުމުގެ މުސްލިމުން އަންނަނީ ބުނަމުންނެވެ.