ރުޤުޔާ ކުރުމުގެ ނަމުގައި ހަތަރު މައިންނަށް އަނިޔާކުރި ދެމީހަކަށް ދައުވާކުރަން ފޮނުވައިފި
މެދު ރާއްޖެ ތެރޭގެ ރަށެއްގައި އަންހެނަކަށާއި އޭނާގެ ތިން ދަރިންނަށް ރުގްޔާގެ ނަމުގައި އަނިޔާކޮށް، ޖިންސީ ގޯނާކުރި މައްސަލައާ ގުޅިގެން ހައްޔަރު ކުރި ދެމީހުންނާ ދެކޮޅަށް ދައުވާ ކުރަން ފުލުހުން ޕްރޮސެކިއުޓަރ ޖެނެރަލްގެ އޮފީހަށް މައްސަލަ ފޮނުވައިފިއެވެ.
މި މައްސަލައިގައި ހައްޔަރުކޮށްފައި ވަނީ އުމުރުން 24 އަހަރާއި 39 އަހަރުގެ ދެ ފިރިހެނުންނެވެ. މި ދެމީހުން ހައްޔަރުކޮށް ޝަރީއަތް ނިމެންދެން ބަންދުކުރުމަށް އަމުރު ކޮށްފައި ވަނީ މިދިޔަ ނޮވެންބަރު މަހުގެ 25 ވަނަ ދުވަހުއެވެ.
ފުލުހުން ވިދާޅުވީ މައްސަލައިގެ ތަޙްޤީޤު ނިންމާ ޕީޖީ އޮފީހަށް މައްސަލަ ފޮނުވީ އިއްޔެ ކަމަށެވެ.
މިމައްސަލައިގައި އަނިޔާ ލިބުނު އަންހެންމީހާ އާއި އޭނާގެ ތިން ދަރިން އެގޭގައި ތިން މަސް ދުވަސް ވަންދެން ރަހީނު ކޮށްގެން ގެންގުޅުނު ކަމަށް އެމީހުން ބުނެފައި ވެއެވެ.
އަދި އެމީހުން ރަހީނު ކޮށްގެން ގެންގުޅެ، ތަފާތު އެކި އަނިޔާތައް ދިނުމުގެ އިތުރުން، އަންހެން މީހާގެ އުމުރުން 7 އަހަރުގެ ކުޑަ އަންހެން ދަރިއަށް ވެސް ޖިންސީ ގޯނާ ކުރި ކަމަށް އެމީހުން މައްސަލަ ހުށަހެޅިއިރު ބުނެފައިވެއެވެ.
