ޕްރޮފެސަރަކު އޭނާގެ ދަރިވަރުންނަށް "އުފާވެރިކަން" ކިޔަވައިދެއްވި ގޮތް، ވަރަށް ވެސް މާނަފުން

އުފާވެރިކަމަކީ ކޮބާ ހެއްޔެވެ؟ އަބަދުމެ އެންމެން ވެސް އުފާވެރިކަން ހޯދަން އުޅެނީ ކީއްވެގެން ހެއްޔެވެ؟ ހަމަ ގައިމު ވެސް މިއީ ކުރަން ނުޖެހޭ ސުވާލު ތަކެކެވެ. އެހެން ނަމަވެސް އުފާވެރިކަމުގެ އަސްލު މާނައަށް އަޅުގަނޑުމެން ރުޖޫއަ ވަމާ ހިނގާށެވެ. އުފާވެރިކަމުގެ މާނަ އަކީ ހިތަށާއި ސިކުނޑިއަށް ލިބޭ ތަނަވަސް ކަން ކަމުގައި ވެސް ބުނެވިދާނެއެވެ. ހިތަށް ލިބޭ ތަސައްލީ އާއި ފަސޭހަ ކަން ކަމުގައި ވެސް މާނަ ކުރެވިދާނެއެވެ. ދިރިއުޅުމުގައި ކޮންމެ މީހަކު ވެސް އުފާވެރިކަން ބޭނުން ވަނީ އެހެންވެގެންނެވެ.

Ads by MWSC

ސުވާލަކީ އަޅުގަނޑުމެން ވިސްނަންވީ އަޅުގަނޑުމެންގެ އަމިއްލަ އުފަލާ މެދު އެކަނި ބާވައެވެ. އަނެކާގެ އުފަލާ މެދު ވިސްނުމަކީ އަޅުގަނޑުމެން ކުރަން ނުޖެހޭ ކަމެއް ބާވައެވެ. އަނެކާގެ އުފާވެރިކަމަށް ނުވިސްނާ އަޅުގަނޑުމެންނަށް އުފަލުގައި އުޅެވިދާނެ ބާވައެވެ. މިވާހަކަތައް ދެއްކީމާ ހަނދާނަށް އަންނަނީ އަޅުގަނޑުމެން އެންމެން ވެސް ދަންނަ އާންމު ޖުމުލައެކެވެ. މީހަކަށް ދެރައެއް ދީފައި އަނެކާއަށް އުފަލުގައި ނޫޅެވޭނެއެވެ. ކަންތައްތައް ކޮންމެ ފަހަރަކު މިހެން ނުވި ނަމަވެސް އަނެކާގެ އުފާތައް ނިގުޅައިގެންފައި ތިބާއަށް އުފަލުގައި ހުރުމަކީ ފަސޭހަ ކަމަކަށް ނުވާނެއެވެ.

އުފާވެރިކަމުގެ ވާހަކަ މިފަހަރު ކިޔައިދޭން މިއުޅެނީ އަޅުގަނޑުގެ އަމިއްލަ ނަޒަރަކުން ނޫނެވެ. ހަނދާނަށް އަންނަނީ ދާދި އިހަކަށް ދުވަހަކު ބޭރުގެ މަޖައްލާއެއްގައި ލިޔެފައިވާ ވާހަކައެކެވެ. އުފާވެރިކަމަކީ ކޮބައިކަން ޕްރޮފެސަރަކު އޭނާގެ ދަރިވަރުންނަށް ކިޔައިދިން ގޮތުގެ ވާހަކައެވެ.

މި ޕްރޮފެސަރު އެންމެ ފުރަތަމަ ކަމަކަށް ވެސް ކުރީ ވަރަށް ތަފާތު ކަމެކެވެ. އުފާވެރިކަން ބަޔަކަށް ކިޔަވައިދިނުމަށް މީހަކު ކޮށްފާނެ ކަމަށް ހީވެސް ނުކުރާނެ ކަމެކެވެ. އޭނާ ކޮންމެ ދަރިވަރަކަށް ފުއްޕާފައިވާ ފުއްޕާހަމެއް ދިނެވެ. އަދި އެއަށްފަހު ކޮންމެ ދަރިވަރެއްގެ ގާތުގައި ވެސް އެ ދަރިވަރެއްގެ ނަން އޭގައި ލިޔުމަށް ޕްރޮފެސަރު އެދުނެވެ.

ޕްރޮފެސަރުގެ އިރުޝާދާއެކު ދަރިވަރުން ފުއްޕާހަން ތަކުގައި ނަން ލިޔުނެވެ. ދެން ޕްރޮފެސަރު އެދުނީ އެ ފުއްޕާހަން ތައް ކުލާހުގެ ތެރެއަށް ދޫކޮށްލުމަށެވެ. ފުއްޕާހަންތައް ކުލާހުގެ ތެރެއަށް ދޫކޮށްލުމުން ކުޑަކުޑަ ކްލާސް ރޫމެއް ކަމުން މުޅި އެތަން ފުރުނެވެ. ޕްރޮފެސަރު އެ ހަންތައް އެކި ދިމަދިމާއަށް އުކުމަށްފަހު ރަނގަޅަށް އެއް ކޮށްލިއެވެ.

ޕްރޮފެސަރު އޭނާގެ ދަރިވަރުންނަށް 5 މިނެޓު ދިނެވެ. އަދި 5 މިނެޓު ތެރޭގައި ކޮންމެ ކުއްޖަކު ވެސް އެ ކުއްޖެއްގެ ނަން ޖަހާފައިވާ ފުއްޕާހަން ހޯދުމަށް ފުރުސަތު ދިނެވެ. ދަރިވަރުންނަށް ލިބުނު 5 މިނެޓުގެ ބޭނުން އޭގެ ތެރެއިން އެއްވެސް ކުއްޖަކަށް ނުހިފުނެވެ. އަމިއްލަ ފުއްޕާހަން އެކަކަށް ވެސް ނުހޯދުނެވެ.

ދެވަނަ ފަހަރަށް ވެސް ޕްރޮފެސަރު ދަރިވަރުންނަށް 5 މިނެޓު ދިނެވެ. މިފަހަރު އެދުނީ ކޮންމެ ދަރިވަރަކު ވެސް އެ ދަރިވަރަކަށް ނެގޭ ފުއްޕާހަމެއް އޭގައި ނަން ޖަހާފައިވާ ވެރި ފަރާތަށް ހަވާލު ކުރުމަށެވެ. 5 މިނެޓު ހަމަ ނުވަނީސް ހުރިހާ ކުދިންނަށް އެކުދިންގެ ހަންތައް ލިބި ހަމަވެއްޖެއެވެ.

ޕްރޮފެސަރު ދަރިވަރުންނާ މުހާތަބުކޮށް ވާހަކަ ދެއްކިއެވެ. އަދި ބުންޏެވެ. އުފާވެރިކަމަކީ ތިޔަ ފުއްޕާހަންތައް ފަދަ އެއްޗެކެވެ. އަމިއްލަ އެދުން އިސްކޮށް އަމިއްލަ އުފާވެރިކަން ހޯދަން އުޅެގެން، ހަގީގީ އުފާވެރިކަމެއް ނުލިބޭނެއެވެ. އެހެން ނަމަވެސް އަނެކާގެ އުފާވެރިކަމަށާއި އަނެކާއާ ދޭތެރޭ ވެސް ވިސްނައިގެން އުފާވެރިކަން ހޯދަން މަސައްކަތް ކޮށްފިނަމަ އަަހަރެމެންގެ އަމިއްލަ އުފާވެރިކަން ވެސް އަހަރެމެންނަށް ހޯދޭނެއެވެ.

ހަގީގަތަކީ މިއީ އެވެ. ޕްރޮފެސަރު ކިޔާދެއްވި ފަދައިން އަނެކާގެ އުފާވެރިކަމާމެދު ނުވިސްނާ އަޅައިނުލާ އުޅެން ހަދައިފި ނަމަ ތިމާގެ އަމިއްލަ އުފާވެރިކަން ތިބާ އަތްފުނާ އަޅައިގެން ހޯދި ނަމަވެސް ލިބުމަކީ ނާދިރު ކަމެކެވެ.