"ވަގުތު" ނޫހުގެ ނޫސްވެރިންނަށް މަރުގެ އިންޒާރުދޭ މައްސަލަ ބަލަން އެމްޖޭއޭއިން ގޮވާލައިފި
އޮންލައިން ނޫސް "ވަގުުތު" އިން ޝާއިޢު ކުރި ތަހުގީގީ ރިޕޯޓަކާ ގުޅިގެން އެ ނޫހުގެ ނޫސްވެރިންނަށް މަރުގެ އިންޒާރު ދެމުން ގެންދާތީ އެ މައްސަލަ ތަހުގީގު ކުރުމަށް މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ގޮވާލައިފިއެވެ.
އައްޑޫގައި ހައްދު ފަހަނައަޅާފައިވާ ފިކުރު ފެތުރެމުންދާ ގޮތާ ގުޅޭ ގޮތުން "ވަގުތު" އިން ވަނީ ދާދި ފަހުން ތަހުގީގީ ރިޕޯޓެއް ޝާއިޢު ކޮށްފައެވެ.
އެކަމާ ގުޅޭ ގޮތުން ބަޔަކު މީހުން ދަނީ އެނޫހުގެ ބައެއް ނޫސްވެރިންގެ ފޮޓޯ ފޭސްބުކްގައި އާއްމުކޮށް، އެނޫސްވެރިންނަށް އިންޒާރު ދެމުންނެވެ. އެގޮތުން އެނޫސްވެރިންނަށް މަރުގެ އިންޒާރު ވެސް ދީފައިވެއެވެ.
މިކަމާއި ގުޅޭގޮތުން އެމްޖޭއޭ އިން ކުރި ޓްވީޓެއްގައި ބުނެފައި ވަނީ "އައްޑޫ ހަރުކަށި ފިކުރުގެ ވިއުގަ - ފިތްކަނޑައިގެންދާހާ ވަރުގަދަ!" މި ނަމުގައި "ވަގުތު" ނޫހުން ޝާއިއުކުރި ލިޔުމަކާ ގުޅިގެން ސޯޝަލް މީޑިއާގައި "ވަގުތު" ނޫހުގެ ނޫސްވެރިންނަށް އިންޒާރު ދެމުން އަންނަކަމަށް އެ ނޫހުން، އެމްޖޭއޭގެ ސަމާލުކަމަށް ގެނެސްފައިވާ ކަމަށާއި އެކަން އެއެސޯސިއޭޝަނުން ކުށްވެރި ކުރާ ކަމަށެވެ.
"މިމައްސަލަ ވީހާވެސް އަވަހަށް ތަހުގީގު ކުރަން ފުލުހުންނަށް ގޮވާލަން" އެމްޖޭއޭ އިން ބުނެފައިވެއެވެ.
ފޭސްބުކް ގައި "ދިވެހި ސިންގަރ" ގެ ނަމުގައި ހިންގާ އެކައުންޓަކުން ވަގުތުގެ ބައެއް ނޫސްވެރިންގެ ފޭސްބުކް އެކައުންޓުތަކުގެ ފޮޓޯއާއެކު ލިޔެފައިވާ ޕޯސްޓެއްގައި ލިޔެފައި ވަނީ :
"ދޭނަން ޢުޤޫބާތް ދިން ފަދައިން ވާނަން ސާބިތު އިންޝާ ﷲ
އުކެނީ ކުޅަނދުރު ހަތަޔަށް އޮށްގާކަން ދަނެތިބެ ކުރިޔަށް ގެންދާށޭ!
ތިޔަ ރޯކުރި ހުޅުގަނޑު ނިއްވާލަން ގައިމޭ މިފަހަރު އުނދަގޫ ވާނޭ" މިފަދައިންނެވެ.
އެނގިފައިވާ ގޮތުގައި މިއީ "ޖިހާދު" ޅެމުގެ ތަންކޮޅެކެވެ. އަދި އެެ ޅެމުގައި ދައްކަނީ ބޯ ކަނޑާ ވާހަކަކަން ވެސް އެނގިފައިވެއެވެ.
Ads by STO
