ކޮވިޑަށް ފައްސިވި ކުރީގެ ފަނޑިޔާރު މުޖްތާޒަށް ވެންޓިލޭޓަރުގައި ފަރުވާ ދެނީ
ލ. ގަމުގައި ކޮވިޑް-19 އަށް ފައްސިވި ކުރީގެ ފަނޑިޔާރު މުޖްތާޒް ފަހުމީ (61އ.) ގެ ހާލުކޮޅު ދެރަވެ ވެންޓިލޭޓަރުގައި ފަރުވާ ދެމުންދާކަމަށް "ދެން" އަށް މައުލޫމާތު ލިބިއްޖެއެވެ.
ޝަރުއީ ދާއިރާގައި އެތައް އަހަރެއް ހޭދަކުރައްވާފައިވާ، ސުޕްރީމް ކޯޓުގެ ކުރީގެ ފަނޑިޔާރު މުޖުތާޒް ކޮވިޑަށް ފައްސި ވެފައިވަނީ މިމަހުގެ 3ވަނަ ދުވަހުގައެވެ.
"ދެން" އަށް އެނގިފައިވާ ގޮތުގައި ކޮވިޑް ފެސިލިޓީގައި ހުރުމަށްފަހު މުޖުތާޒްގެ ހާލުކޮޅު ދެރަވާން ފަށާފައިވަނީ އިއްޔެއެވެ. އަދި އޭނާގެ ހާލު ދެރަވެ، މިއަދު ހަވީރު ދަރުމަވަންތަ ހޮސްޕިޓަލަށް ބަދަލު ކޮށްފައިވާ ކަމަށް ވެސް މައުލޫމާތު ލިބިފައިވެއެވެ.
"މުޖުތާޒުގެ ހާލުކޮޅު ކުރިން ހުރީ ހަމަ ވަރަށް ރަނގަޅަށް. ނަމަވެސް އިއްޔެ ކުއްލިއަކަށް ނޭވާއަށް އުނދަގޫވެ ހާލު ދެރަވާން ފެށީ" ގަމު ހޮސްޕިޓަލުގެ އޮފިޝަލަކު މައުލޫމާތު ދެއްވާފައިވެއެވެ.
ގަމު ކައުންސިލު ނައިބު ރައީސް އަހުމަދު ޝާހީން މީގެ ކުރިން "ދެން" އަށް މައުލޫމާތު ދެއްވަމުން ވިދާޅުވީ ކޮވިޑްގެ އަލާމާތްތައް މުޖުތާޒުގެ ގައިން އެންމެ ފުރަތަމަ ފެނުނީ ކުނަހަންދޫ ކައިރީގައި އޮންނަ ކުޑަފުށި ކިޔާ ފަޅުރަށެއްގައި ހުންނަވަނިކޮށް ކަމަށެވެ. ސާމްޕަލް ނެގުމަށްފަހު ކޮވިޑަށް ފައްސިކަން އެނގުނީ ސާމްޕަލް ނެގުމަށްފަހު ޓެސްޓު ކުރުމުންނެވެ.
މިހާރު ކޮވިޑް-19 ޖެހިފައިވާ 634 މީހަކު ރާއްޖޭގައި ތިބިއިރު މީގެ ތެރެއިން 38 މީހުންނަކީ އަތޮޅު ތެރޭގެ އެކި ރަށްރަށުން ކޮވިޑް-19 ޖެހިފައިވާ މީހުންނެވެ.
