ކައިވެނި ޕާޓީ ކްލަސްޓަރ: 92 މީހަކު ކޮވިޑަށް ފައްސިވެއްޖެ
ޝީ ބިލްޑިންގްގައި މިދިޔަ މަހުގެ 20 ވަނަ ދުވަހު ބޭއްވި ކައިވެނި ޕާޓީއަކާއި ގުޅިގެން އުފެދުނު ކްލަސްޓާއަކުން، މިހާތަނަށް 92 މީހަކު ކޮވިޑް-19 އަށް ފައްސި ވެއްޖެއެވެ.
އެނގިފައިވާ ގޮތުގައި ޖުމްލަ 120 މީހުން ދިޔަ އެކައިވެނި ޕާޓީއިން ގިނަ ބަޔަކު ފައްސި ވެފައި މިވަނީ، ބަލީގެ އަލާމާތްތައް ހުރި އެންމެ މީހަކު އެޕާޓީއަށް ދިޔުމުންނެވެ.
ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނީ ކޮންޓެކްޓުން ގޮތުގައި ގިނަ ބަޔަކު ފާހަގަ ކުރެވި، 260 އަށް ވުރެ ގިނަ މީހުންގެ ސާމްޕަލް މިހާތަނަށް ނަގާފައިވާ ކަމަށެވެ. ނަމަވެސް އެއަދަދު އިތުރުވުން ވެސް އެކަށީގެންވާ ކަމަށް އެސެންޓަރުން ބުނެފައިވެއެވެ.
ކައިވެނި ޕާޓީ ކްލަސްޓަރ އިން ފައްސިވީ މީހުންގެ ތެރޭގައި 18 އަހަރު ނުވާ ގިނަ ކުޑަކުދިންތަކަކާ ހައި ރިސްކު މީހުން ވެސް ހިމެނެއެވެ.
އެކްލަސްޓަރ އިން ފައްސިވީ މީހުންގެ ތެރޭގައި ފަސް ބިދޭސީއަކު ވެސް ހިމެނެ އެވެ. އެއީ ސްލޮވޯކިއާ އަދި ކޮލޮމްބިއާގެ ދެ އަންހެނުންނާއި ބަންގްލަދޭޝް ދެ ފިރިހެނަކާއި ސްރީލަންކާ ފިރިހެނެކެވެ.
މިއީ މިހާތަނަށް ފެނުނު އެންމެ ބޮޑު އެއް ކްލަސްޓާ އެވެ.