މުންދު ފުލުހަށް ހާޒިރުކުރީ ދަރުމަވަންތަ ހޮސްޕިޓަލު ރަހުނުކުރަން އެދޭ ސިޓީ ލީކުވެގެން
އިދިކޮޅު ޕީއެންސީގެ ނައިބު ރައީސް މުޙައްމަދު ޙުސެއިން ޝަރީފް (މުންދު) މިއަދު ފުލުހުންގެ އިދާރާ އަށް ހާޒިރުކުރީ ދަރުމަވަންތަ ހޮސްޕިޓަލް ރަހުނެއްގެ ގޮތުގައި ބަހައްޓަން ފިނޭންސް މިނިސްޓްރީގެ ދަށަށް އެ އިމާރާތް ރަޖިސްޓްރީ ކުރަން އެދިވަޑައިގެން އެ މިނިސްޓްރީއިން ރައީސް އޮފީހަށް ފޮނުވާފައިވާ ސިޓީ ލީކުވެ އެ ސިޓީއާ އެކީ އޭނާ ކުރެއްވި ޕޯސްޓަކާ ގުޅިގެން ކަމަށް މުންދު ވިދާޅުވެއްޖެއެވެ.
މިއަދު މެންދުރުފަހު 3:00 އަށް ފުލުހުންގެ އިދާރާއަށް މުންދު ހާޒިރުވުމަށްފަހު، އެއިދާރާ ކުރިމަތީގައި ނޫސްވެރިންނަށް މައުލޫމާތު ދެއްވަމުން މުންދު ވިދާޅުވީ، ލީކުވި އެސިޓީއާ ގުޅިގެން މީގެ ކުރިންވެސް އެމަނިކުފާނު ފުލުހުންގެ އިދާރާއަށް ހާޒިރު ކުރެއްވި ކަމަށެވެ.
ދަރުމަވަންތަ ހޮސްޕިޓަލް ރަހުނެއްގެ ގޮތުގައި ބަހައްޓަން ފިނޭންސް މިނިސްޓްރީގެ ދަށަށް އެ އިމާރާތް ރަޖިސްޓްރީ ކުރަން އެދިވަޑައިގެން އެ މިނިސްޓްރީން ރައީސް އޮފީހަށް ފޮނުވާފައިވާ ސިޓީ ލީކު ވެފައިވަނީ މިދިޔަ އަހަރުގެ ނޮވެމްބަރު މަސް ތެރޭގައެވެ.
މުންދު ވިދާޅުވީ ގޮތަކަށް އެ ސިޓީ ލީކުވެފައިވީ ނަމަވެސް ގާނޫނު އަސާސީއާއި މިހާރު އަމަލު ކުރަމުންދާ ގާނޫނުތަކުގެ ދަށުން އެ މައްސަލަ ނުބެލޭނެ ކަމަށެވެ.
މީގެއިތުރުން މުންދު ވަނީ، ކުރައްވާ ޓްވީޓެއް ނޫނީ މީސް މީޑިއާގެ ޕޯސްޓަކާ ގުޅިގެން ފުލުހުންގެ އިދާރާއަށް ހާޒިރު ނުކުރާނެ ކަމަށް ރިޔާސީ އިންތިހާބުގެ ތެރޭގައި ރައީސް އިބްރާޙިމް މުހައްމަދު ޞާލިޙު ވައުދުވެ ވަޑައިގެންނެވި ކަން ވެސް ފާހަގަ ކުރައްވާފައެވެ.
"ގާނޫނު އަސާސީގެ ހިޔާލު ފާޅު ކުރުމުގެ މިނިވަން ކަމުގެ ހައްގާއި، މައުލޫމާތު ލިބިގަތުމުގެ ގާނޫނާއި، ވިސްލްބްލޯ ގާނޫނު، މި ގާނޫނުތަކާ އެކީ، މިއީ ބެލޭނެ މައްސަލައެއް ކަމަށް ނުދެކެން، ކޮންމެ ގޮތަކަށް ލީކްވި ސިޓީއަކަސް، ރައީސް އިބްރާހިމް މުހައްމަދު ޞާލިޙު ވެސް ވައުދުވެވަޑައިގެންފައިވާ ކަމެއް އެއީ މީސް މީޑިއާގައި ކުރައްވާ ޕޯސްޓަކުން ހާޒިރު ނުކުރާނެ ކަން" މުންދު ވިދާޅުވެފައިވެއެވެ.
