ލޯބިވާ އަނބިމީހާ ހިނިތުން ކުރުވުމަށްޓަކައި...!

ގައުމު ތަހުޒީބު ވަނީ އާއިލާތައް ހަރުދަނާވީ މިންވަރަކުންނެވެ. ހަރުދަނާ އާއިލާއެއް ބިނާ ކުރުމަށްޓަކައި ހާސްކަމާއި ހިތްދަތިކަމުން ދުރުގައިވާ އުފާވެރި ވެއްޓެއް ދެމަފިރިންގެ މެދުގައި ބިނާ ކުރަން ޖެހޭނެއެވެ. މިގޮތުގެ މަތީން ތިބާގެ ހަޔާތުގެ ބައިވެރިޔާ، ލޯބިވާ އަނބީމީހާ އުފާވެރިކަން މަތީ ބެހެއްޓުމަށް ޓަކައި އަންނަނިވި ނުކުތާތަކަށް ފަރުވާތެރިކަން ބަހައްޓާށެވެ.

Ads by Sosun Fihaara

ރިވެތި މަރުޙަބާއެއް ކިޔުން

ދަތުރަކުން ނުވަތަ ވަޒީފާއަކުން ވިޔަސް އަނބިމީހާއާ ވަކިވެހުރެ އެނބުރި އައިސް:

• ހިނިތުންވެފައިވާ މޫނަކާއެކު ނޫނީ ގެއަށް ނުވަންނާށެވެ.
• ހިނިތުންވެ ހުރެ ސަލާމް ކޮށްލާށެވެ. އެއީ އޭނާއަށްޓަކައި ކޮށްލެވޭ ހެޔޮ ދުޢާ އެކެވެ.
• އޭނާގެ އަތުގައި ހިފާލާފައި އުފާވެރި ބަސްކޮޅެއް ބުނާށެވެ. އަދި ހިތާމަވެރި ޚަބަރެއް އޮތް ނަމަވެސް ފަހުން ބުނަން މަޑުކޮށްލާށެވެ.

ވާހަކަ ދެއްކުން 

• އަނބިމީހާ އުފާވާނޭ ފަދަ ގޮތަކަށް މުޚާތަބު ކުރާށެވެ.
• ހަމައެކަނި ތިބާގެ ވާހަކަ ދައްކާފައި ހުއްޓާ ނުލާށެވެ. އަނބިމީހާގެ ވާހަކައަށް ވެސް ސަމާލުކަންދީ ކަނުލައި އަޑުއަހާށެވެ.
• ތިބާ ބުނާ އެއްޗެއް ސާފުވާނޭ ގޮތަށް ބުނާށެވެ. ތަކުރާޜު ކުރަމުން މަޑުމައިތިރި ކަމާއެކު ވާހަކަ ދައްކާށެވެ.
• އަނބިމީހާ އުފާވާނޭ ފަދަ ނަމަކުން ގޮވާށެވެ. މިސާލަކަށް ، މަގޭ ލޯބިވާ ، ލޯބިގަނޑު ، ނުވަތަ އަނބިމީހާގެ ނަން ކުރުކޮށް ނަމަވެސް ބޭނުން ކުރެވިދާނެއެވެ.

އެކުވެއުޅުން 

• އަނބިމީހާޔާއެކު ވާހަކަ ދެއްކުމުގައި ކޮންމެ ދުވަހަކު ވެސް ކޮންމެވެސް ވަގުތުކޮޅެއް ހޭދަ ކޮށްލާށެވެ.
• އުފާވެރި ވާހަކަތަކުން އެކަމަނާ ހިތް ހަމަޖައްސައިދޭށެވެ.
• ދެމީހުންގެ ކުރީގެ ފޮނި ހަނދާންތައް އެކަކު އަނެކަކަށް ކިޔައިދީ ހިތް އުފާ ކުރާށެވެ.

ސަމާސާ ކުރުން 

• އަނބިމީހާއަށް ޖޯކް ފަދަ ތަކެތި ކިޔައިދީ ސަމާސާކޮށް އޭނާ ހެއްވާށެވެ.
• ގޭތެރޭގައި ކުޅެވޭ ޒާތުގެ ކުޅިވަރެއް އަނބިމީހާއާއެކު ކުޅޭށެވެ.
• ކުޅޭ އެއްވެސް ކުޅިވަރެއްގައި ނުވަތަ ސަމާސާއެއްގައި ވިޔަސް ޙަރަމާ ކަންތަކުން އެއްކިބާ ވާށެވެ.

ގޭތެރޭ މަސައްކަތުގައި އެހީތެރިވުން 

• ގޭގައި އުޅޭ ދުވަސްތަކުގައި ގޭތެރޭ މަސައްކަތުގައި އަނބިމީހާއަށް ވީވަރަކުން އެހީތެރިވެދޭށެވެ. ޚާއްޞަކޮށް ބައިވެރިޔާ ބަލިވެއުޅޭ ދުވަސްވަރުގައްޔާއި ވަރުބަލިވެފައިވާ ވަގުތުތަކުގައެވެ.
• އަނބިމީހާ ގޭތެރޭގައި ކުރާ ބުރަ މަސައްކަތަށް ތަޢުރީފް ކުރާށެވެ. އެއީ އޭނާއަށް މަސައްކަތް ކުރުމަށް ލިބޭ ވަރަށް ބޮޑު ހިތްވަރަކާއި ބާރެކެވެ.
• ޚާއްޞަކޮށް އާއިލާގެ އެހެން މެމްބަރުންނާ ޖެހޭ މައްސަލަތަކުގައި ޙައްލު ކުރާނެ ގޮތަކާމެދު އަނބިމީހާއާ ވާހަކަ ދައްކާށެވެ.
• މައްސަލަތައް ޙައްލު ކުރުމަށް އަނބިމީހާގެ އިހްސާސްތަކާއި މަޝްވަރާއަކީ ފިރިމީހާއަށް ވަރަށް މުހިންމު އެއްޗެއް ކަމުގައި ބުނާށެވެ.
• ޖެހިގެން އުޅޭ މައްސަލައެއް ޙައްލު ކުރުމުގައި ބައިވެރިޔާގެ ޚިޔާލަކީ ކޮބައިތޯ ބަލާށެވެ.
• އަނބިމީހާގެ ޚިޔާލަކީ ރަނގަޅު ޚިޔާލެއް ކަމުގައި ވާނަމަ އެގޮތަށް ކަންތައް ކުރާށެވެ.
• މައްސަލަތައް ޙައްލު ކުރުމަށް އަނބިމީހާދޭ ޚިޔާލުތަކާއި ބަހައްޓާ އޯގާތެރިކަމަށްޓަކައި ޝުކުރު އަދާ ކުރާށެވެ.

ޒިޔާރަތް ކުރުން

• ރަނގަޅު ރަޙްމަތްތެރިން ހޯދާށެވެ. އަދި އެމީސްމީހުންގެ ގެއަށް މަދުމަދުން ޒިޔާރަތް ކުރާށެވެ.އެއީ ސަވާބާއި ދަރުމަ ވެސް ލިބޭނޭ ކަމެކެވެ.
• ޒިޔާރަތް ކުރުމުގައި އިސްލާމީ ރިވެތި ގޮތްތަކަށް ތަބާވާށެވެ.
• އަނބިމީހާ ދާން ބޭނުން ނުވާ ތަނަކަށް ދިޔުމަށް މަޖުބޫރު ނުކުރާށެވެ.

ނުނިމޭ.

މަސްދަރު: އަޙުމަދު އަސްލަމްގެ މަޒުމޫނު