ނެއްލައިދޫން ފަސް މީހަކު ކޮވިޑަށް ފައްސިވެއްޖެ
ހދ. ނެއްލައިދޫ ހޯމް ކަރަންޓީނުގައި ތިބި ފަސް މީހަކު ކޮވިޑަށް ފައްސި ވެއްޖެއެވެ.
އެރަށު ސިއްހީ މަރުކަޒުން ބުނީ، އެރަށު ގެއެއްގައި ކަރަންޓީންގައި ތިބި ފަސް މީހަކު ކޮވިޑް-19 އަށް ފައްސިވެފައިވާ ކަމަށެވެ. އެރަށުން ފައްސި ވެފައިވަނީ އެއް އާއިލާއެއްގެ ފަސް މެންބަރުންނެވެ. އެމީހުން ފައްސި ވެފައިވަނީ ހޯމް ކަރަންޓީން ނިންމުމަށްފަހު ނެގި ރިލީޒް ސާމްޕަލުންނެވެ.
ނާޒިމް ވިދާޅުވީ އެ މީހުންނަކީ އިންޑިއާގައި ތިބުމަށްފަހު ރާއްޖެއައި ބައެއް ކަމަށް މައުލޫމާތު ލިބިފައިވާ ކަމަށެވެ. މިއާއެކު އެ މީހުންގެ ކަރަންޓީންގެ މުއްދަތު އިތުރު 14 ދުވަސް ޖަހާފައިވާ ކަމަށް އެރަށު ސިއްހީމަރުކަޒުން ބުނެފައި ވެއެވެ.
މިހާރު ރާއްޖެއިން ކޮވިޑަށް ޖުމްލަ 14،830 މީހުން ފައްސި ވެފައިވެއެވެ.
ރާއްޖެއިން މިހާރު ކޮވިޑް ބަލިން ފަސޭހަ ވެފައި ވަނީ ޖުމްލަ 13,731 މީހުންނެވެ. އަދި މިބަލީގައި ރާއްޖެއިން ނިޔާވި މީހުންގެ ޖުމްލަ އަދަދު މިހާރު 50 އެވެ. ހޮސްޕިޓަލުތަކުގައި މިހާރު ފަރުވާ ހޯދަމުން ދަނީ 69 މީހުންނެވެ.
ރާއްޖޭގައި ބަލި ފެތުރުން މިހާރު ބޮޑުތަނުން ކޮންޓްރޯލް ވެފައިވީ ނަމަވެސް، ރައްކާތެރިވުމުގެ ގޮތުން އަޅަންޖެހޭ ފިޔަވަޅުތަކަށް ބައެއް ފަރާތްތަކުން ފަރުވާ ކުޑަކުރަމުން އަންނަކަން އެޗްޕީއޭއިން ފާހަގަ ކުރެއެވެ.
