ތުރުކީން އާޖެންޓީނާގެ މުސްލިމުންނަށް 7000 މުސްހަފް ހަދިޔާ ކޮށްފި
ތުރުކީން އާޖެންޓީނާގެ މުސްލިމުންނަށް ކީރިތި ޤުރުއާންގެ 7000 މުސްހަފް ހަދިޔާ ކޮށްފިއެވެ.
ތުރުކީއާއި އާޖެންޓީނާއާ ދެމެދު އޮންނަ އެކުވެރިކަމާ ްެއެއްބައިވަންތަ ކަމުގެ ރަމްޒެއްގެ ގޮތުން ތުރުކީން ފޮނުވި ހަދިޔާއާ ހަވާލުވީ އާޖެންޓީނާގެ އިސްލާމީ މަރުކަޒުންނެވެ. އެކަމަށް ޓަކައި އިއްޔެގެ ހުކުރު ނަމާދަށް ފަހު ވެރިރަށް ބުއެނޮސް އައިރެސްގެ އަލްއަޙްމަދު މިސްކިތުގައި ޚާއްޞަ ހަފްލާއެއް ވެސް ވަނީ ބާއްވާފައެވެ.
ތުރުކީން ފޮނުވި ހަދިޔާގެ ތެރޭގައި 7000 މުސްހަފްގެ އިތުރުން ޤުރުއާން ތަރުޖަމާއާއި ޤުރުއާން އުނގެނުމަށް ބޭނުން ކުރާ ފޮތްތަކާއި ޙަދީޘް ފޮތްތައް ވެސް ހިމެނެއެވެ.
އާޖެންޓީނާގައި މުސްލިމް އާބާދީއަކީ އެންމެ ކުޑަ އާބާދީއެވެ. 45 މިލިއަނެެއްހާ މީހުންގެ އާބާދީގެ ތެރޭގައި މުސްލިމުންނަކީ މިލިއަނެއްހާ މީހުންނެވެ. ނަމަވެސް ލެޓިން އެމެރިކާ ގައުމުތަކުގެ ތެރެއިން މުސްލިމުން އެންމެ ގިނައީ ވެސް އާޖެންޓީނާގައެވެ.
