ޢާއިލީ ވަގުތަކީ އެތައް މައްސަލަތަކުގެ ހައްލެވެ.

ޒަވާޖީ ޙަޔާތެއް ފެށުމަކީ ވަރަށް ބޮޑު ޒިންމާއެކެވެ. ވަރަށް ގިނަ މަސްއޫލިއްޔަތު ތަކެއް ބޮލުގައި އަޅަން ޖެހޭ ކަމެކެވެ. ދިރިއުޅުމުގެ ވައްޓަފާޅިއަށް ބަދަލުތަކެއް އަންނާނެ އަދި ގެންނަން ޖެހޭނެ ވެސް ކަމެކެވެ. ހާއްސަކޮށް ފިރިހެނުންނެވެ. ސަބަބަކީ ޢާއިލާއެއް ބިނާކުރުމުގައި ޢާއިލާގެ އިސް މީހާ ކަމަށް ވާނީ ފިރިހެން މީހާ ކަމަށް ވާތީއެވެ.

ކަށީގައި ހިފާފައި ހުންނަ ނުރަނގަޅު އާދަތައް ވެސް ކެނޑުވޭތޯ މަސައްކަތް ކުރަންޖެހެއެވެ. މި މުޖުތަމަޢަށް ބަލާލަނަމަ ޖަވާޒީ ޙަޔާތެއް ފެށުމަށް ފަހުން އެންމެ ފުރަތަަމަ އުފެދިގެންދާ މައްސަލައެއްގެ ގޮތުގައި ފާހަގަ ކުރެވެނީ ފިރިންގެ ފަރާތުން ޢާއިލީ ވަގުތު ހުސްކޮށް ނުދެވުމުގެ ސަބަބުން އުފެދިގެންދާ މައްސަލަތަކެވެ. މަދުން ނަމަވެސް އަނބިންގެ ފަރާތުން ވެސް މި މައްސަލަ ކުރިމަތި ވާ ކަން ފާހަގަ ކޮށްލާނަމެވެ.

ޢާއިލީ ވަގުތު ނުދެވުމުގެ އެންމެ ބޮޑު ހުރަހަކަށް ދިމާވަނީ ރައްޓެހިންނެވެ. އާއިލާ ބިނާ ކުރުމަށް ކުރަންޖެހޭ މަސައްކަތް އަދާ ކުރަންޖެހޭ ވަޒީފާއެއްގެ ގޮތުން ޢާއިލާއަށް ބޭނުންވާ ވަރަށް ވަގުތު ހުސްކޮށް ނުދެވުމަކީ ވެދާނެކަމެކެވެ. އެކަން ޤަބޫލުކުރަން ވެސް ޖެހެއެވެ. އެއީ އަދި ވަކި ހާލަތެކެވެ. ނަމަވެސް އެއާ ޚިލާފަށް ރޭގަނޑުގެ ގިނަ ވަގުތު ތަކެއް ރައްޓެހިންނާ އެކު މަޖަލުގައި ހޭދަކުރާ ފިރިން ރާއްޖޭގައި ވަރަށް ގިނައެވެ.

ޤަބޫލުކުރަމެވެ. ރައްޓެހިންނަކީ ދިރިއުޅުމުގައި ވަރަށް މުހިއްމު ބައެކެވެ. ރައްޓެހިންނާއެކު ވެސް ވަގުތު ހޭދަކޮށް ކަންކަމާ ހިޔާލު ބަދަލުކޮށްލުމަކީ ކުރަން ޖެހޭނެ ވެސް ކަމެކެވެ. ތަފާތު ވެގެން މިދަނީ ވަގުތާއި ހާލަތެވެ. އިސްކަންދެވޭ ތަރުތީބެވެ. ރޭގަނޑު ހޭލާ ، އަނބިދަރިން ގޭގައި ބައިތިއްބާފައި ރައްޓެހިންނާއެކު ބޭރުތެެރޭ އެއްވެސް މުހިއްމު ބޭނުމެއްނެތް ގޮތުގައި ހޭދަ ކުރުމަކީ ގޯހެކެވެ. އަދި އެފަދަ ކަންކަމަށް ހިތްވަރުދޭ ރައްޓެހިންނަކީ ހެޔޮއެދޭ ރައްޓެހިންކަމަކަށް ޤަބޫލެއް ނުކުރެވޭނެއެވެ.

ރަނގަޅު ހެޔޮއެދޭ ރައްޓެހިން އެކުވެރިޔާގެ ޢާއިލީ ވަގުތުތަކަށް ހުރަކަށް ނުވާނެއެވެ. ކުރިން ވެސް ދެންނެވި ފަދައިން ޒަވާޖީ ޙަޔާތަކީ ވަރަށް މަތިވެރި މަޤުސަދެއްގައި ކުރެވޭ ކަމެކެވެ. އެއީ ކުޅި ކުޅިވަރަށް ނުވަތަ އެހެން މަޖުބޫރެއްވެގެން ނުވަތަ ވަކި މީހަކު ބުނީތީ ނުވަތަ ވަކި ބަޔަކަށް ދެއްކުމުގެ ނިޔަތުގައި ކުރެވޭ ކަމަކަށް ނަހަދާށެވެ. ހެޔޮލަފާ ޖީލެއް ބިނާކޮށް ބާއްޖަވެރި މުސްތަގުބަލެއް ހޯދުމުގެ ނިޔަތުގައި ކުރާ ކަމަކަށް ހަދާށެވެ.

ކަމެއް ކާމިޔާބު ވަނީ ޤުރުބާނީ ތަކެއް ވެސް ވެގެންނެވެ. ދިރިއުޅުމެއް ކާމިޔާބު ކުރެވޭނީ ހިތް އެދޭ އެތައް އެތައް ކަމެއް ޢާއިލާއަށްޓަކައި އަނބިދަރިންގެ ހައްޤުގައި ޤުރުބާން ކޮށްގެންނެވެ. ޢާއިލީ ވަގުތު ދެވެން އޮވެ އެހެން ކަންކަމަށް އެވަގުތު ހުސްކުރުމަކީ އެހެން ބަޔަކަށް އެ ވަގުތު ދިނުމަކީ އަނބިދަރިންނަށް ދެވޭ ކިހާ ބޮޑު އަނިޔާއެއް ހެއްޔެވެ. ރޭގަނޑު ހަތަރުދަމު އަނބިމީހާ ، ފިރިމީހާގެ އިންތިޒާރުގައި ހޭލާ އަންނާނެ އިރަކަށް ދަމަށް ބޭންދުމަކީ އުފުލަން ޖައްސާ ކިހާ ބޮޑު ތަކްލީފެއް ހެއްޔެވެ. ޢާއިލީ ވަގުތު ތަކަކީ ދުޅަހެޔޮ ޒަވާޖީ ޙަޔާތެއްގެ ކުރި ބޯއްޓެވެ. ޢާއިލީ އެތައް މައްސަލަތަކެއްގެ ހައްލެވެ.