ރާއްޖޭގެ ހުރިހާ ހޮސްޕިޓަލްތަކެއްގައި މާދަމާ ވެކްސިން ދޭން ފަށާނެ
ރާއްޖޭގެ ހުރިހާ ހޮސްޕިޓަލުތަކެއްގައި މާދަމާ ކޮވިޑް-19 ވެކްސިން ޖަހަން ފަށަން ނިންމައިފިއެވެ.
އޮންލައިން ނޫހެއް ކަމަށްވާ "މިހާރު" އަށް ދިން އިންޓަވިއުއެއްގައި ގައުމީ ވެކްސިން ޕްރޮގްރާމްގެ ހެޑް ޑރ. ނަޒްލާ ރަފީގް ވިދާޅުވީ ރާއްޖޭގެ ހުރިހާ ހޮސްޕިޓަލްތަކެއްގައި މާދަމާ ވެކްސިން ދޭން ފަށާނެ ކަމަށެވެ.
ނަޒްލާ ވިދާޅުވީ އަމާޒަކީ ރާއްޖޭގެ ހުރިހާ ސިއްހީ ހިދުމަތްތެރިންނަށް 10 ދުވަސް ތެރޭގައި ވެކްސިން ޖަހާ ނިންމާލުން ކަމަށެވެ.
ރާއްޖޭގައި އިއްޔެ ކޮވިޑް-19 ވެކްސިން ޖަހަން ފަށާފައިވާއިރު، ފުރަތަމަ ވެކްސިން ޖަހާފައިވަނީ މާލޭގެ 5 ހޮސްޕިޓަލެއްގެ އިތުރުން އަތޮޅު ތެރޭގެ ދެ ހޮސްޕިޓަލެއްގައެވެ. މާލެ ސަރަހައްދުގައި ވެކްސިން ޖަހާފައި ވަނީ އައިޖީއެމްއެޗާއި ހުޅުމާލެ ހޮސްޕިޓަލާއި ވިލިމާލެ ހޮސްޕިޓަލާއި އޭޑީކޭ ހޮސްޕިޓަލުގެ އިތުރުން ޓްރީޓޮޕް ހޮސްޕިޓަލްގައެވެ. އަދި އަތޮޅު ތެރެއިން އައްޑޫ ސިޓީ އިން އައްޑޫ އެކުއަޓޯރިއަލް ހޮސްޕިޓަލް އަދި ކުޅުދުއްފުށީގައި، ކުޅުދުއްފުށީ ރީޖަނަލް ހޮސްޕިޓަލެވެ.
ސަރުކާރުގެ އިސްވެރީން ހިމެނޭހެން އިއްޔެ 282 މީހަކަށް ވެކްސިން ޖަހާފައިވާ ކަމަށް އެޗްއީއޯސީން ހާމަކުރެއެވެ.
އިންޑިއާގެ ސެރަމް އިންސްޓިޓިއުޓުން އުފެއްދި "ކޮވިޝީލްޑް" ވެކްސިންގެ އެއް ލައްކަ ޑޯޒް އެޤައުމުން ވަނީ ރާއްޖެއަށް ހިލޭ ހަދިޔާ ކޮށްފައެވެ.
އިންޑިއާއިން ރާއްޖެއަށް ހަދިޔާ އަސްޓްރާޒެނެކާ ވެކްސިން ރާއްޖޭގައި ބޭނުން ކުރުމުގެ ހުއްދަ ރާއްޖޭގެ ފުޑް އެންޑް ޑްރަގް އޮތޯރިޓީން ދީފައި ވަނީ މި މަހުގެ 26 ވަނަ ދުވަހުއެވެ. މި ވެކްސިން އަށް ދީފައި ވަނީ "ރިސްޓްރިކްޓެޑް ޔޫސް އިން އިމަޖެންސީ ސިޗުއޭޝަން" ނުވަތަ ކުއްލި ހާލަތުގައި ބޭނުން ކުރުމުގެ ހުއްދައެވެ.
