ޗެމްޕިއަންސް ލީގު އޮގަސްޓްގައި، ކުއާޓަރއިން ފެށިގެން ދެ ލެގެއް ނުކުޅޭނެ!
ޔޫރަޕްގެ އެންމެ ބޮޑު ކުލަބު ފުޓްބޯޅަ މުބާރާތް އަންނަ އޮގަސްޓް މަހު ފަށަން ނިންމައިފިއެވެ.
ކޮވިޑް-19ގެ ސަބަބުން ޔޫއެފާ ޗެމްޕިއަންސް ލީގުގެ ކުޅުން އޮތީ މެދު ކަނޑާލާފައެވެ. އަނެއްކޮޅުން އަލުން ފަށާއިރު ބަދަލްތަކެއް ގެންނަން ޔުއެފާއިން މަޝްވަރާކުރަމުން އަންނަކަމަށްވެސް ޚަބަރު ފެތުރުނެވެ.
ޔުއެފާއިން މިވަނީ އެންމެ ފަހުން ޔޫރަޕްގެ ކުލަބު ފުޓްބޯޅަ މުބާރާތްތަކުގެ ތަފްސީލްތައް ހާމަކޮށްފައެވެ. މިގޮތުން ޗެމްޕިއަންސް ލީގުގެ ގަދަ ސޯޅައިގެ ބާކީ ހުރި ހަތަރު މެޗު ނިމުމާއިއެކު ދެން ކުޅޭ ހުރިހާ މެޗެއްވެސް ކުޅޭނީ ނޮކްއައުޓް އުސޫލުން އެންމެ ލެގެކެވެ. ކުއާޓަރ ފައިނަލް، ސެމީ ފައިނަލް އަދި ފައިނަލް މެޗުތައް ކުޅޭނީ އޮގަސްޓް 12އިން 23އަށް އެއް ސްޓޭޑިއަމެއްގައެވެ. ހުރިހާ މެޗެއްވެސް ކުޅޭނީ ޕޯޗުގަލްގެ ލިސްބަންގައެވެ.
އަންހެން ޗެމްޕިއަންސް ލީގުގެ މެޗުތައްވެސް ހަމަ މި އުސޫލުން ކުޅޭނީ ސްޕެއިންގެ އެތްލެޓިކް ބިލްބާއޯގެ ސްޓޭއަމްގައެވެ. އަންހެން މެޗުތައް ކުރިއަށްދާނީ 21 އޮގަސްޓުން 30 އޮގަސްޓަށެވެ.
ޔުއެފާ ޔޫރޮޕާ ލީގުގެ މެޗުތައް ކުޅެން ހަމަޖެހިފައިވަނީ 5 އޮގަސްޓުން 21 އޮގަސްޓަށެވެ. ޔޫރޮޕާ ލީގުގެ ކުއާޓަރ ފައިނަލުން ފެށިގެން ބާކީ ހުރި މެޗުތައް ކުޅޭނީ ޖަރުމަންގެ އެކި ސިޓީތަކުގައެވެ.
ޗެމްޕިއަންސް ލީގު އަދި ޔޫރޮޕާ ލީގުގެ މެޗުތަކަށް ސަޕޯޓަރުން ވެއްދުމާއި ގުޅޭގޮތުން އަދި ޔުއެފާއިން ގޮތެއް ނުނިންމައެވެ. ޔުއެފާއިން ބުނީ އަލުން މި މުބާރާތްތައް ފެށޭނެކަމުގެ ޔަގީންކަމެއްވެސް ކުރިން ނެތްކަމަށާއި، މިހާރު މުބާރާތް ފަށަން ތާވަލް އެކުލަވާލެވުމުން ސަޕޯޓަރުންނާއިއެކު މޗުތައް ކުޅެވޭނެކަމުގެ އުއްމީދު އެބައޮތްކަމަށެވެ. އެހެންކަމުން މިކަމާއިމެދު ގޮތެއް ނިންމާނީ އަންނަ މަހުކަމަށް ޔުއެފާއިން ބުންޏެވެ.
Ads by STO
