ލިވަޕޫލަށް ނޫނެކޭ ބުނެ ވާނާ ޗެލްސީއަށް ސޮއިކުރީ ކީއްވެ؟
ކުރިއަށް އޮތް ޓްރާންސްފަރގައި ލިވަޕޫލުން ސޮއިކުރަން ބޭނުންވި ފުރަތަމަ ކުޅުންތެރިޔަކީ ޖަރުމަންގެ ފޯވާޑް ޓިމޯ ވާނާއެވެ. އޭނާ ހޯދުމަށް މިދިޔަ ދެ ޓްރާންސްފަރގައި ވެސް ލިވަޕޫލުން މަސައްކަތްކުރިއެވެ. އަނެއްކޮޅުން ވާނާވެސް ހުރީ ލިވަޕޫލްގެ ޖަރުމަން ކޯޗު ޔާގެން ކްލޮޕްގެ އިރުޝާދުގެ ދަށުން ކުޅެން ތައްޔާރުވެގެންނެވެ.
ލިވަޕޫލުން ބަލަހައްޓައިގެން ތިއްބާ ޕްރިމިއަރ ލީގުގެ ޗެލްސީން މިވަނީ ވާނާގެ ސޮއި ހޯދާފައެވެ. ކުޅުންތެރިޔާވެސް އަދި ލިވަޕޫލުންވެސް ބޭނުންވެފައި އޮތް ކަމެއް ނުވެ އެންމެ ފަހުން ވާނާ ޗެލްސީއާއި ގުޅުނީ ކީއްވެ؟ މިއީ ގިނަ ބަޔަކު މިހާރުވެސް ކުރަމުން އަންނަ ސުވާލެކެވެ.
ޗެލްސީން ވާނާ ގަންނަން 102.5 މިލިއަން ޕައުންޑް ހޭދަކުރަން ޖެހުނެވެ. ވާނާ ޗެލްސީއާއި ގުޅެނީ އޭނާއަށް މިހާރު ލިބޭ މުސާރައަށްވުރެ ދެ ގުނަ ބޮޑު މުސާރައަކަށެވެ. އަނެއްކޮޅުން އޭޖެންޓަށް ދައްކަން ޖެހޭ ފީއަށްވެސް ބޮޑު އެއްޗެއް ހޭދަވިއިރު، ޓްރާންސްފަރ ފީއަށް 50 މިލިއަން ޕައުންޑް ހޭދަވިއެވެ. ޗެލްސީއާއިއެކު ވާނާ 5 އަހަރުގެ ކޮންޓްރެކްޓެއްގައި ސޮއިކުރާނެއެވެ.
ވާނާ ސޮއިކުރުމާއި ގުޅޭގޮތުން ފުރަތަމަ މަޝްވަރާކުރީ ލިވަޕޫލުންނެވެ. އޭނާގެ އޭޖެންޓާއިއެކު މިދިޔަ ޖެނުއަރީން ފެށިގެން މެދުނުކެނޑި މަޝްވަރާތައް ކުރިއަށްދިޔައެވެ. ވާހަކަތަކަށް ހުއްޓުމެއް އައީ މިދިޔަ އޭޕްރީލްގައި ކޯޗު ކްލޮޕް ކުޅުންތެރިޔާގެ ފޯމާއިމެދު ސުވާލު އުފެއްދި ހިސާބުންނެވެ. އަނެއްކޮޅުން ކުޅުންތެރިޔާގެ ރިލީސް ކްލޯސްގެ 45 މިލިއަން ޕައުންޑް ދައްކަންވެސް ލިވަޕޫލުން ފަސްޖެހުމުންނެވެ.
ވާނާ ލިވަޕޫލަށް ބަދަލުވުމުގައި އެންމެ ބޮޑު މަޑު ޖެހުމެއް އައީ ކުޅުންތެރިޔާއަށް ދައްކަންޖެހޭ ފީ ކުޑަކުރަން ލިވަޕޫލުން ބޭނުންވުމެވެ. ކުޅުންތެރިޔާގެ ކޮންޓްރެކްޓްގައި 4 އަހަރު އޮތުމާއިއެކު ފީ ކުޑަކުރަން ލީޕްޒިގުން ބޭނުންނުވެއެވެ. އަނެއްކޮޅުން ކުޅުންތެރިޔާގެ ބޯނަސްއަށް ބޭނުންވާ އަދަދާއިމެދު ވެސް ދެބަސްވުން އުފެދުނެވެ. މީގެ އިތުރުން ޓީމްގެ ފުރަތަމަ އެގާރައިން ޖާގަ ލިބޭނެކަމުގެ ޔަގީންކަން ކުޑަވުމުން ވާނާ ބޭނުންވީ ލިވަޕޫލަށް ސޮއިނުކޮށް މަޑުކުރާށެވެ. އަދި ޗެލްސީން އޭނާ ބޭނުންވާ ހުރިހާ ކަމަކާއިއެކު ހުށަހެޅުން ލިބުމުން ވަގުތުން އެކުލަބަށް އާނއެކޭ ބުނީއެވެ.
ވާނާ ހޯދުމަށް ބަޔާން މިޔުނިކާއި އެތްލެޓިކޯ މެޑްރިޑުންވެސް ޝައުގުވެރިކަން ފާޅުކުރިއެވެ. މިދިޔަ ސީޒަން ނިމުނުއިރު ވާނާ ގަތްނަމަ ކުލަބުތަކުން ހޭދަކުރަން ޖެހޭނީ 22 މިލިއަން ޕައުންޑެވެ. ނަމަވެސް މި ސީޒަން ފެށުމުގެ ކުރިން ވާނާވަނީ ލީޕްޒިގްގެ އެއްބަސްވުން 3 އަހަރަށް އައުކޮށްފައެވެ. އެހެންކަމުން އޭނާގެ އަގުވަނީ މިކޮންޓްރެކްޓާއިއެކު ދެ ގުނަ އިތުރުވެފައެވެ.
ޗެލްސީން ވާނާއަށް ހަފްތާއަކު 175 ލައްކަ ޕައުންޑް ދޭނެއެވެ. ހަމައެހެންމެ އޭޖެންޓަށް ފީގެ ގޮތުގައި 12 މިލިއަން ޕައުންޑް ދޭނެއެވެ.
ޗެލްސީއަށް ސޮއިކުރުމާއިއެކު ވާނާ ވަނީ ލީޕްޒިގްގެ ޗެމްޕިއަންސް ލީގު ސްކޮޑުގައި ނުހިމެނުމަށް އެކުލަބުގައި އެދިފައެވެ. ސަބަބަކީ އޮގަސްޓް މަހު މުބާރާތުގެ މެޗުތައް ކުޅެން އޮތުމެވެ. ލީޕްޒިގްވަނީ ޗެމްޕިއަންސް ލީގުގެ ކުއާޓަރ ފައިނަލުން ޖާގަ ހޯދާފައެވެ. ވާނާ ޗެލްސީއަށް ސޮއިކުރިކަން ދެ ކުލަބުންވެސް ޔަގީންކޮށްދީފައިވާއިރު، އޭނާ ވަނީ ލީޕްޒިގްގެ ސަޕޯޓަރުންނަށްވެސް މިހާރު ވަދާއީ މެސެޖު ފޮނުވާފައެވެ.
ޗެލްސީން އައު ސީޒަންގެ ޓްރާންސްފަރ ބާޒާރު ފެށުމުގެ ކުރިން 2 ކުޅުންތެރިއެއްގެ ސޮއި ހޯދިއިރު، މިހާރު އެޓީމުން ފާރަލަމުން އަންނަނީ ވާތްފަޅިން ފަހަތަށް ކުޅޭނެ ޑިފެންޑަރެއް ގަތުމަށެވެ. އެގޮތުން ލެސްޓަރގެ ބެން ޗިލްވެލް ގަތުމާއި ގުޅޭގޮތުން އޭނާގެ އޭޖެންޓާއިއެކު މަޝްވަރާތައްވަނީ ފަށާފައެވެ.
