މެލޭޝިއާ މަގުން 3.2 ކިލޯގެ ޑްރަގު އެތެރެކުރަން އުޅުނު ދިވެއްސަކު އަތުލައިގެންފި
މެލޭޝިއާއިން ރާއްޖެ އައި ދިވެއްސެއްގެ އަތުން 3.2 ކިލޯގެ ހެރޮއިން ކަސްޓަމްސްއިން އަތުލައިގެންފިއެވެ.

ވައިގެ މަގުން ރާއްޖެއަށް އެތެރެކުރަން އުޅުނު ތިން ކިލޯއަށްވުރެ ގިނަ މަސްތުވާތަކެތި މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.
މި ތަކެތި އަތުލައިގަތީ މި މަހުގެ އަށްވަނަ ދުވަހު މެލޭޝިއާއިން ރާއްޖެ އައި ފަސިންޖަރެއްގެ އަތުންނެވެ.
ކަސްޓަމްސްއިން ބުނި ގޮތުގައި، މި މައްސަލައިގައި ހިފަހައްޓާފައި ވަނީ އުމުރުން 32 އަހަރުގެ ދިވެހި ފިރިހެނެކެވެ. އޭނާގެ ލަގެޖުގައި މަސްތުވާތަކެތި ހުރި ކަމަށް ޝައްކު ކުރެވިގެން ބަލައިފާސްކުރިއިރު، ފެނުނު ތަކެތި ތަހުލީލު ކުރުމުން ވަނީ ހެރޮއިންއަށް ޕޮޒިޓިވްވެފައެވެ. އަތުލައިގަތް މަސްތުވާތަކެތީގެ ބަރުދަނުގައި ޖުމްލަ 3.2 ކިލޯ ހުރި ކަމަށް އެ އިދާރާއިން މައުލޫމާތުދެއެވެ.
މި މައްސަލައިގައި އަތުލައިގަތް މަސްތުވާތަކެއްޗާއި ތުހުމަތު ކުރެވޭ މީހާ މިހާރު ވަނީ އިތުރު ތަހުގީގަށް ދިވެހި ފުލުހުންގެ ހިދުމަތާ ހަވާލުކޮށްފައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.