ޕާކިސްތާނާ ދެމެދު ވިޔާފާރީގެ ގުޅުން ބަދަހިކުރުމުގެ މަޝްވަރާތައް ފަށައިފި
ޕާކިސްތާނާއި ރާއްޖެއާ ދެމެދު އޮތް ވިޔަފާރީގެ ގުޅުން ވަރުގަދަކުރުމަށްޓަކައި ދެ ޤައުމުގެ މެދުގައި މަތީ ފަންތީގެ މަޝްވަރާތަކެއް ބާއްވައިފިއެވެ.
ޕާކިސްތާނާއި ރާއްޖެއާ ދެމެދު އޮތް ވިޔަފާރީގެ ގުޅުން މިހާރަށްވުރެ ފުޅާކުރުމަށްޓަކައި ދެ ޤައުމުގެ ދެމެދުގައި މަޝްވަރާތައް ފަށައިފިއެވެ.
މި މަޝްވަރާތަކަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދާދިފަހުން ޕާކިސްތާނަށް ކުރެއްވި ރަސްމީ ދަތުރުފުޅުގައި ދެ ޤައުމުގެ އިޤްތިޞާދީ ގުޅުން ބަދަހިކުރުމަށް ނިންމެވި ނިންމެވުމާ ގުޅިގެން ކުރިއަށްދާ މަޝްވަރާތަކެކެވެ.
މި ބައްދަލުވުމުގައި ރާއްޖޭގެ ފަރާތުން އިސްކޮށް ބައިވެރިވެވަޑައިގެންނެވީ އިޤްތިޞާދީ ތަރައްޤީއާ ބެހޭ ވަޒީރު މުޙައްމަދު ސަޢީދެވެ. އޭގެ އިތުރުން އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހީމާއި، އެމްޕީއެލްގެ ސީއީއޯ ޙުސައިން ޝަފީޤާއި ވުޒާރާގެ އިސްވެރިން ބައިވެރިވެވަޑައިގެންނެވިއެވެ. ޕާކިސްތާނުގެ ފަރާތުން ބައިވެރިވެވަޑައިގެންނެވީ ކޮމާސް މިނިސްޓަރު ޖަމް ކަމާލް ޚާނާއި، މެރިޓައިމް އެފެއާޒް މިނިސްޓަރު މުޙައްމަދު ޖުނައިދު އަންވަރު ޗައުދަރީގެ އިތުރުން އެ ޤައުމުގެ އިސް އޮފިޝަލުންނެވެ.
ވަޒީރު ސަޢީދު ވިދާޅުވީ މި މަޝްވަރާތަކުގައި މައިގަނޑު ގޮތެއްގައި ބަލާފައި ވަނީ ދެ ޤައުމުގެ ދެމެދުގައި ވިޔަފާރީގެ މުޢާމަލާތްތައް އިތުރުކުރެވޭނެ ދާއިރާތަކާއި، އިޤްތިޞާދީ ގުޅުން ހަރުދަނާކުރުމަށް ހުރި ފުރުޞަތުތަކުގެ މައްޗަށް ކަމަށެވެ.
ޕާކިސްތާނާއި ރާއްޖެއާ ދެމެދު މިހާރު ކުރެވެނީ އަހަރަކު ގާތްގަނޑަކަށް 13.9 މިލިއަން ޑޮލަރުގެ ވިޔަފާރިއެވެ. ނަމަވެސް، ރައީސް މުޢިއްޒު މިދިޔަ މަހުގެ 20އިން 22އަށް ޕާކިސްތާނަށް ކުރެއްވި ދަތުރުފުޅުގައި ދެ ޤައުމުގެ ވެރިން ވަނީ ކުރިއަށް އޮތް ދެ އަހަރު ދުވަހުގެ ތެރޭގައި މި އަދަދު 200 މިލިއަން ޑޮލަރަށް އިތުރުކުރުމަށް އަމާޒު ހިފާފައެވެ. މި ދަތުރުފުޅުގެ ތެރެއިން އިސްލާމްއާބާދުގައި ބޭއްވި ބިޒްނަސް ފޯރަމެއްގައި ރާއްޖޭގައި ހުރި އިންވެސްޓްމަންޓް ފުރުޞަތުތަކުގެ މަޢުލޫމާތު ވެސް ވަނީ ޕާކިސްތާނުގެ ވިޔަފާރިވެރިންނާ ހިއްސާކޮށްފައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.