ފެނިގެން ދިޔައީ ޒާތީ ހަސަދަ ފިލުވުމަށް އެތައް ބައެއްގެ ޙައްޤު ގުރުބާން ކުރިތަން:ގައްސާން
ފެނިގެން ދިޔައީ ޒާތީ ހަސަދަ ފިލުވުމަށް އެތައް ބައެއްގެ ޙައްްޤު ގުރުބާން ކުރިތަން ކަމަށް ޕީޕީއެމްގެ ނައިބު ރައީސް އަދި ތ.ގުރައިދޫ ދާއިރާގެ މެމްބަރު މުހައްމަދު ގައްސާން މައުމޫން ވިދާޅުވެއްޖެއެވެ.
ރައީސް ޔާމީންގެ ސަރުކާރުގައި ހިންގެވި 7000 ފްލެޓްގެ ހިޔާ މަޝްރޫއުގެ ދަށުން ފްލެޓް ލިބުނުކަމުގެ ލިޔުން ލިބުނު ގިނަ ބަޔަކަށް ފްލެޓް ނުލިބި ސިޔާސީ މީހުންނާއި އެމީހުންގެ އާއިލާތަކަށް ފްލެޓް ބަހާލުމާ ވިދިގެން ގައްސާން ކުރެއްވި ޓްވީޓެއްގައި ވިދާޅުވީ އަދުލު އިންސާފުގެ އަސާސަކީ ހަމަހަމަކަން ކަމަށާއި "އިންސާފުގެ ދަތުރު"ގެ ވާހަކައިން ރައްޔިތުން ބެއްލެވީ އެ މިންގަނޑަށް ކަމަށެވެ.
"(ނަމަވެސް) ފެންނަނީި ޒާތީ ހަސަދަ ފިލުވުމަށް އެތަކެއް ރައްޔިތުންގެ ހައްގު ގުރުބާން ކުރިތަން ، ބާރާ ނުފޫޒުން އަނދުން އެޅުވި ތަން ،ދެއްކީ ހުސް ވާހަކަކަން، އެއްވެސް އިޚްލާސްތެރިކަމެއް ނެތްކަން" ގައްސާން ވިދާޅުވިއެވެ.
މިހާތަނަށް ހިންގި ބޯހިޔާވަހި ކަމުގެ އެންމެ ބޮޑު މަޝްރޫއުގެ ދަށުން ފްލެޓް ލިބުނު މީހުންގެ ލިސްޓް މި ސަރުކާރުން އާންމު ކުރިއިރު ރައީސް ޔާމީންގެ މައްޗަށް ހުކުމް އިއްވެވި ފަނޑިޔާރު ޢަލީ ރަޝީދާއި އޭނާގެ އާއިލީ މެމްބަރުންނަށް ފްލެޓް ލިބުނުކަން ފާހަގަ ކޮށްލެވެއެވެ. ރައީސް ޔާމީންގެ މައްސަލަ ބައްލަވަމުން ގެންދެވި އަހުމަދު ހައިލަމްގެ މައްޗަށް ސުލޫކީ މައްސަލައެއް ހުށަހެޅުމާއި ގުޅިގެން އޭނާ މަގާމުން ވަކިކޮށް ރައީސް ޔާމީންގެ މައްސަލަ ބެއްލެވީ އަލީ ރަޝީދެވެ. ނަމަވެސް އަލީ ރަޝީދު ، ހުކުމް ކުރެއްވީ އެ މަނިކުފާނުގެ މައްޗަށް ވެސް ސުލޫކީ މައްސަލައެއް ހުށަހެޅިފައި ވަނިކޮށެވެ.
މީގެ އިތުރުން ހިޔާ މަޝްރޫއުގެ ފްލެޓްތަކަކީ އިންސާނުން އުޅެން ކަމުނުދާ ތަނެއް ކަމަށާއި އެއީ ކޮތަރު ކޮށިތަކެއް ކަމަށް ކުރީގެ އިދިކޮޅު ފަރާތްތަކުން ސިފަ ކުރައްވާފައި ވީ ނަމަވެސް ރައީސް ސޯލިޙްގެ ކޮއްކޯފުޅު އައިޝަތު މުޙައްމަދު ސޯލިހަށް ވެސް ފްލެޓް ލިބުނުކަން ފާހަގަ ކޮށްލެވެއެވެ.
