ކުޅަނދުރަކަށް ކޮންމެ ދުވަހަކު ފެންދޭ ކައްދޫ މިސްކިތެއްގެ އިމާމެއްގެ ވާހަކަ

މުނިފޫހިފިލުވާލުމުގެ ނިޔަތުގައި އާދައިގެ މަތިން މީސްމީޑިއާގެ އެކިއެކި "އެޕްތައް" ބަލާލަން ފެށީމެވެ.

Ads by STELCO

އެގޮތުން ގިނަ ބަޔަކު ވަންނަ "ފޭސްބުކް" ހުޅުވާލާ، އެހެން މީހުން ޕޯސްޓު ކޮށްފައި ހުންނަ އެއްޗެހި ޓައިމްލައިނުން ބަލަމުން ދަނިކޮށް ލޮލުގައި އަޅައިގަތީ ލ. ކައްދޫ މިސްކިތެއްގެ އިމާމަކު ލިޔެފައިވާ ޕޯސްޓެއްގައެވެ.

ފެން އިސްކުރަކާ ކުޅަނދުރެއް ފެންނަން އިން ފޮޓޯއަކާއެކު އެޕޯސްޓުގައި ކައްދޫގައި ހުންނަ އެމްއެންޑީއެފް މިސްކިތް ކަމަށްވާ މަސްޖިދުލް ސަބީލި ގައި އިމާމުވެ ނަމާދުކުރައްވާ ޢަބްދުﷲ މާހިދު ލިޔުއްވާފައިވަނީ، ކޮންމެ ދުވަހެއްގެ ވެސް މެންދުރު ނަމާދު ވަގުތާއި، ޢަސްރު ނަމާދު ވަގުތު އަދި މަޣްރިބް ނަމާދު ވަގުތު ގާތްވުމުން ކުޅަނދުރެއް އިސްކުރު ކައިރީގައި އެނބުރޭ ކަމަށެވެ. އަދި އެކުޅަނދުރަށް ކޮންމެ ދުވަހަކު ފެން ދޭ ކަމަށް އޭނާ ބުނެފައި ވެއެވެ.

ކުޅަނދުރަކީ އާންމު ގޮތެއްގައި ނުރައްކާތެރި އަދި ކަށި ޖަހައިފިނަމަ މީހާގެ ހަށިގަނޑު ވިހަވާ އެއްޗެއްގެ ގޮތުގައި ސިފަވެފައި އޮތުމުންނާއި، އޭގެ ނުރައްކާތެރިކަން ސިފަކޮށް ދިނުމުގެ ގޮތުން "ކުޅަނދުރު ހަތަޔަށް އޮށްގާ ނުއުކާށޭ" ބުނެ ބުނެފައިވާ ހަރުބަހެއް ވެސް އޮތުމުން، އެފަދަ ނުރައްކާތެރި އެއްޗަކަށް އިމާމު ފެން ދެއްވާ ވާހަކަ ވެެގެން ދިޔައީ އަޅުގަނޑުގެ ސަމާލުކަމާއި ޝައުޤުވެރިކަން ދަމައިގަތް ކަމަކަށެވެ.

އެހެންކަމުން އެކަމާއިމެދު "ދެން" ގެ ފަރާތުން އިތުރަށް ޢަބްދުﷲ މާހިދުއާ ސުވާލު ކޮށްލީމެވެ.

"އަޅުގަނޑަކީ މިސްކިތުގައި ބަންގިގޮވައި އިމާމުވެ ނަމާދުކުރާ މީހަކަށްވާތީ ނަމާދު ވަގުތު ވުމުގެ 30 ވަރަކަށް މިނެޓު ކުރިން މިސްކިތަށް ދަން. އެއީ ފެންޑާމަތި ފޮޅާލައި ވުޟޫކުރާތަން ހަޑިވެފައިވާނަމަ ސާފުކޮށްލުމަށް. މިގޮތަށް ދާއިރު ކޮންމެ ދުވަހެއްގެ މެންދުރާއި ޢަޞްރު އަދި މަޣްރިބު ވަގުތު ކުޅަނދުރެއް ފެން އިސްކުރު ކައިރީގައި އުދުހޭތީ ފެނޭ. އެއް އިސްކުރު ކައިރިން އަނެއް އިސްކުރު ކައިރިއަށް އެކުޅަނދުރު އުދުހޭ. އެސޮރުގެ ޙަރަކާތްތަކުން އެސޮރު އުޅެނީ ފެން ބޭނުން ވެގެން ކަން އެނގުނު ،  އެހެންކަމުން ފެން އިސްކުރެއް ދޫކޮށްލުމަށް ފަހު އިސްކުރުގެ ވަށައިގެން ފެން އަޅާލަން. އެއާ އެކު އެސޮރު އެތަނުގައި އިށީނދެ އިނދެ ފެންބޮއިގެެންދޭ" އެމިސްކިތުގައި އިމާމުވެ ނަމާދު ކުރައްވާ މާހިދު ކިޔައި ދެއްވިއެވެ.

މާޙިދު ވިދާޅުވީ އެފަދައިން ކޮންމެ ދުވަހަކު ތިން ފަހަރަށް ކުޅަނދުރު އަންނަ ކަމަށާއި އެހެން އަންނަތާ މިހާރު ދެ ހަފްތާވަރު ވެދާނެ ކަމަށެވެ. ކޮންމެ ދުވަހެއްގެ އެވަގުތުތައް އެކުޅަނދުރަށް ފާހަގަ ވަނީ ކަމަށް ވެސް މާޙިދު ވިދާޅުވިއެވެ.

އަނެއްކާވެސް ސުވާލު އުފެދުނީ ކުޅަނދުރަކީ ނުރައްކާތެރި އެއްޗެއްކަމަށް ވާތީ، އެމިސްކިތުގައި އިމާމުވެ ނަމާދު ކުރައްވާ މާހިދު އެއްވެސް ވަރަކަށް ބިރު ނުގަނޭތޯއެވެ. ޖަވާބުގައި އޭނާ ވިދާޅުވިއެވެ.

"ބިރެއް ނުގަނޭ. އަތަށް ފެން އަޅައިގެން އަތުން އެއަށް ފެން ދެވޭތޯ ވަރަށް މަސައްކަތް ކުރަން. އެކަމަކު އޭތި އަތަކަށް ނުޖައްސާ. އެއަށް ހީވަނީ ކަމަށް ވެދާނެ އަނިޔާއެއް ދޭން އުޅެނީހެން. އެކަމަކު އިސްކުރު ދޫކޮށްފަ އިސްކުރު މައްޗަށް ފެން އަޅާލީމަ އޭތި އައިސް އެތަނުން ފެން ބޮއޭ އަޅުގަނޑު އެތަނުގައި ކައިރީގައި ހުއްޓަސް. އޭތި އަންނައިރު އާންމުކޮށް ހުންނަނީ ފެން ހިކިފަ. އިސްކުރު ބޭރުގައި ވެސް ނުހުރޭ ފެނެއް" މާހިދު ވިދާޅުވިއެވެ.

ކޮންމެއަކަސް މިއިން އަޅުގަނޑަށް އިބުރަތެއް ވެސް ހާސިލު ވެއްޖެއެވެ. އެއީ ކިތަންމެ ނުރައްކާތެރި އެއްޗަކަށް ވެސް އޯގާތެރިކަމާއެކު ޢަމަލު ކޮށްފިނަމަ، ގެއްލުމެއް ނުލިބޭނެ ކަމެވެ.