ބަލި ހާލަތެއް މެދުވެރިވިޔަސް، ރާއްޖެއިން ބޭރަށް ދާކަށް ނޭދޭނަން: ނިހާން
ޕީޕީއެމްގެ ޕާލިމަންޓްރީ ގުރޫޕްގެ ކުރީގެ ލީޑަރު އަދި މިހާރުގެ ޖުމްހޫރީ ޕާޓީގެ ކައުންސިލް މެމްބަރު އަހުމަދު ނިހާންގެ މައްޗަށް ކުރާ ދައުވާތަކާ ގުޅިގެން އޭނާގެ ޕާސްޕޯޓް، މައްސަލަ ނިމެންދެން ހިފަހައްޓަން ކްރިމިނަލް ކޯޓުން ދެންމެ އަމުރު ކޮށްފިއެވެ.
ރައްޔިތުންގެ މަޖިލީހުގެ ވިލިމާލޭ ދާއިރާގެ ކުރީގެ މެމްބަރު އަހުމަދު ނިހާންގެ މައްޗައް ދައުލަތުން ކުރަނީ ރިޝްވަތުގެ ހިފުމުގެ ތިން ދައުވާއަކާއި ރިޝްވަތު ލިބިގަތުމަށް އެދުމުގެ ދެ ދައުވާ އަކާއި މަނީ ލޯންޑްރިންގެ ދައުވާ އެކެވެ.
މި މައްސަލަތައް ނިމެންދެން ނިހާންގެ ޕާސްޕޯޓު ހިފެހެއްޓުމުން ނިހާން ވިދާޅުވީ ތަހުގީގު މަރުހަލާއިން ފެށިގެން ވެސް ރާއްޖެއިން ބޭރަށް ވަޑައިގަތުމުގެ ވިސްނުމެއް އޭނާ ނުގެންގުޅުއްވާ ކަމަށެވެ. އަދި ދައުލަތުން ބޭނުން މުއްދަތަކަށް ޕާސްޕޯޓު ހިފަހައްޓާފައި ބާއްވަންވީ ކަމަށް ނިހާން ވިދާޅުވިއެވެ.
"ރާއްޖެއިން ބޭރަށް ފުރުމުގެ ވިސްނުމެއް ނެތް މިދިޔަ އަހަރުން ފެށިގެން ވެސް. އެ ބޭފުޅުން ހިފަހައްޓަން ބޭނުންވާ މުއްދަތަކަށް ހިފަހައްޓަން އަމުރު ނެރެ ދެއްވާ. އަޅުގަނޑު ބަލި ވިޔަސް، ފުރަން ނޭދޭނަން އިނގޭތޯ އިރާދަކުރެއްވިއްޔާ،" ނިހާން ވިދާޅުވި އެވެ.
ދައުލަތުން ނިހާންގެ ޕާސްޕޯޓު ހިފަހައްޓަން އެދުނީ އޭނާގެ ޕާސްޕޯޓު ހިފަހެއްޓުމަށް ކުރިމިނަލް ކޯޓުން ނެރުނު އަމުރުގެ މުއްދަތު ހަމަވުމާ ގުޅިގެންނެވެ. ޕާސްޕޯޓު ހިފެހެއްޓުމާމެދު އެއްވެސް މައްސަލައެއް ނެތް ކަމަށް ނިހާން ވިދާޅުވުމުން، ޝަރީޢަތް ނިމެންދެން ނުވަތަ ޝަރީޢަތުން އެހެން ގޮތެއް ނިންމަންދެން ނިހާނުގެ ޕާސްޕޯޓު ހިފަހައްޓަން ކޯޓުން ނިންމާފައި ވެއެވެ.
