ސަރުކާރުން ހިންގާ އެންމެ ބޮޑު މަޝްރޫޢަކީ ޖިންސީ ފުރައްސާރަ ކުރުން: މެމްބަރު ސަލީމް
މިސަރުކާރުން ހިންގާ އެންމެ ބޮޑު މަޝްރޫޢަކީ އަންހެނުންނަށް ޖިންސީ ފުރައްސާރަކުރުން ކަމުގައި ރައްޔިތުންގެ މަޖިލީހުގެ އޭދަފުށީ ދާއިރާގެ މެމްބަރު އަހްމަދު ސަލީމް ވިދާޅުވެއްޖެއެވެ.
މަޖިލީހުގެ މައިނޯރިޓީ ލީޑަރު އެމްޕީ ސަލީމް މިހެން ވިދާޅުވެފައި ވަނީ ޖިންސީ ކުށުގެ 7 ދައުވާއެއް އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓު ދޫކޮށް، އޭނާ ފުރުވާލާފައިވާ މައްސަލައިގައި ސަރުކާރަށް ފާޑުވިދާޅުވެ ކުރެއްވި ޓުވީޓެއްގައެވެ.
ރާއްޖެ ދޫކޮށް އަލީ ވަހީދު މިހާރު ފުރާފައިވާއިރު ޕީޖީ އިން ބުނެފައިވަނީ، އޭނާގެ ޕާސްޕޯޓު ދޫކޮށްލުމަކީ ދައުލަތުން ބޭނުންވި ގޮތް ނޫން ކަމަށާއި ހަތަރު މަސް ފަހުން އަލީ ވަހީދު އަނބުރާ ނައިސްފިނަމަ އޭނާއާ ދެކޮޅަށް ފިޔަވަޅު އަޅާނެ ކަމަށެވެ.
ޖިންސީ ކުށުގެ ދައުވާތަކެއް އުފުލާފައިވާ އަލީ ވަހީދު ފުރުވާލި މައްސަލައިގައި ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފައެވެ. އަދި މިއީ ސީދާ ރައީސް އިބްރާހިމް މުޙައްމަދު ޞާލިޙަށް އެނގިވަޑައިގަތް ކުރެއްވެވި ކަމެއް ކަމުގައި ވެސް ގިނަ ފަރާތްތަކުން ދަނީ ބުނަމުންނެވެ.
