ކޮވިޑް-19: ފުވައްމުލަކުން އިތުރު ތިން މީހަކު ފައްސިވެއްޖެ
ފުވައްމުލަކުން އިތުރު ތިން މީހަކު ކޮވިޑް-19 އަށް ފައްސި ވެއްޖެއެވެ.
ފުވައްމުލަކު ސިޓީން އިތުރު ތިން މީހަކު ކޮވިޑަށް ފައްސިވުމާ ގުޅިގެން އެރަށުން ފައްސިވީ މީހުންގެ ޖުމްލަ އަދަދު މިވަނީ 20 އަށް އަރާފައެވެ.
ފުވައްމުލަކު އިމަޖެންސީ އޮޕަރޭޝަންސް ސެންޓަރުން މިރޭ ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފުވައްމުލަކު ހޮސްޕިޓަލުގެ ސީނިއާ ކޮމިއުނިޓީ ހެލްތް ވޯކާ އާމިނަތު އަހުމަދު ވިދާޅުވީ، ފައްސިވެފައިވާ މީހުންނަކީ އެއީ ޑައިރެކްޓް ކޮންޓެކްޓުން ކަމަށެވެ.
މިހާތަނަށް ބެލިބެލުމުން ފައްސިވެފައިވާ މީހުންނާއި ޑައިރެކްޓް ކޮންޓެކްޓްވި މީހުންގެ އަދަދު 645 އަށް އަރާ ކަމަށް ވެސް އެ ސެންޓަރުން މިރޭ ބުނެފައި ވެއެވެ.
ފުވައްމުލަކުގައި ކޮވިޑް-19 ފެތުރިފައި މިވަނީ ދުބާއީގައި ހުރެފައި އެރަށަށް ކަރަންޓީނަށް ދިޔަ މީހެއްގެ ފަރާތުންނެވެ. އޭގެ ފަހުން ދުވަހުން ދުވަހަށް އެސިޓީން ފައްސިވާ މީހުންގެ އަދަދު އަންނަނީ އިތުރުވަމުންނެވެ.
