ކޮވިޑް-19: ގުރައިދޫން އެއް އާއިލާއަކުން އަށް މީހަކު ފައްސިވެއްޖެ
ކ.ގުރައިދޫން އެއް އާއިލާއެއްގެ އަށް މީހަކު ކޮވިޑް-19 އަށް ފައްސިވެއްޖެއެވެ.
ގުރައިދޫ ކައުންސިލުގެ ނައިބު ރައީސް އިބްރާހިމް ޝަލީޒް "ދެން" އަށް މައުލޫމާތު ދެއްވަމުން ވިދާޅުވީ، ފައްސި ވެފައިވަނީ މާލެ އައުމަށްފަހު އެރަށަށް ގޮސް ކަރަންޓީނު ވެގެން ތިބި އާއިލާއެއް ކަމަށާއި ނަމަވެސް އެމީހުންގެ ސާމްޕަލް ނެގީ ބަލީގެ އަލާމާތްތަކެއް ފެނިގެން، ކަރަންޓީނު ގެ މުއްދަތު ހަމަނުވަނީސް ކަމަށެވެ.
"އެބޭފުޅުން ރިކުއެސްޓު ކޮށްގެން ސާމްޕަލް ނެގީ. ނަގައިގެން މިއަދު އެނގުނީ ފައްސިކަން. އެމީހުންގެ ކަރަންޓީނު ނިމެން އަދި 3 ވަރަކަށް ދުވަސް އެބައޮތް. އެންމެންވެސް ތިބީ ކަރަންޓީނުގައި. އެމީހުންނާ އިތުރު ބަޔަކު ކޮންޓެކްޓް ވެފައެއް ނުވޭ. އަދި އެންމެންގެ ހާލުވެސް ރަނގަޅު" ޝަލީޒް ވިދާޅުވިއެވެ.
ޝަލީޒް ވިދާޅުވީ، ގުރައިދޫން މިއަދު ކޮވިޑަށް ފައްސިވީ އާއިލާގައި ހަތަރު ކުޑަކުދިންވެސް ތިބިކަމަށާއި އެކުދިންގެ ސީދާ އުމުރެއް ދަންނަވަން ނޭނގޭ ކަމަށެވެ. ނަމަވެސް އެއެންމެންގެ ހާލުވެސް ރަނގަޅުކަމަށް ޝަލީޒް ވިދާޅުވިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުކޮށްފައިވާ ސާވޭލަންސް ޑޭޓާއަށް ބަލާއިރު މިއަދު ރާއްޖެއިން ކޮވިޑަށް ފައްސި ވެފައިވަނީ މާލެއިން 89 މީހުންނާއި، އަތޮޅުތެރެއިން 22 މީހަކާއި ހިންގަމުން އަންނަ ރިސޯޓުތަކުން 32 މީހަކާއި ކަނޑުމަތީ އުޅަނދުތަކުން 2 މީހެކެވެ.
މިހާރު ރާއްޖެއިން މިބައްޔަށް ޖުމްލަ 18،612 މީހުން ފައްސި ވެފައިވެއެވެ.
ރާއްޖެއިން މިހާރު ކޮވިޑް ބަލިން ފަސޭހަ ވެފައިވަނީ ޖުމްލަ 16،061 މީހުންނެވެ. އަދި މިބަލީގައި ރާއްޖެއިން ނިޔާވި މީހުންގެ ޖުމްލަ އަދަދު މިހާރު 60 އެވެ.
