ފަތުރުވެރިޔާ މޫދަށް އެރުނު ކަމުގެ "ސްޓްރޯންގް އެވިޑެންސް" ލިބިފައިވޭ، ބެލެވެނީ މޫދަށް ގެއްލުނީ ކަމަށް: ފުލުހުން

މި މަހުގެ 13 ވަނަ ދުވަހު ރާއްޖޭގެ ރިސޯޓަކުން ސްނޯކެލިން އަށް ގޮސް އުޅެނިކޮށް ގެއްލުނު ފަތުރުވެރިޔާ، އެދުވަހު މޫދަށް އެރުނު ކަމުގެ "ސްޓްރޯންގް އެވިޑެންސް" ލިބިފައިވާ ކަމަށާއި އެހެންކަމުން ބޮޑަށް ބެލެވެނީ މޫދަށް ގެއްލުނީ ކަމަށް ފުލުހުން ވިދާޅުވެއްޖެއެވެ.

Ads by STELCO

"ދެން" އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލަކު ވިދާޅުވީ އިތުރު މައުލޫމާތެއް މި ހާދިސާއާ ގުޅިގެން އަދި ލިބިފައި ނެތް ކަމަށާއި ނަމަވެސް އެއީ އަދިވެސް ތަހުގީގު ކުރެވެމުން ދާ މައްސަލައެއް ކަމަށެވެ.

"މިކޮޅުގެ ތަހުގީގަށް އެބަހުރި ހަމަ ސްޓްރޯންގް އެވިޑެންސް ލިބިފައި އޭނަ މޫދަށް އެރުނު ކަމުގެ، އެހެންވީމަ ތަހުގީގަށް ބެލެވެނީ މޫދަށް ގެއްލުނީ ކަމަށް. އިތުރަށް އެއްވެސް ކަމަކަށް ތުހުމަތު ކުރެވޭނެ އެވިޑެންސެއް ފުލުހުންނަށް ލިބިފައެއް ނެތް." ފުލުހުން ވިދާޅުވިއެވެ.

މިހާދިސާ ގައި ގެއްލިފައިވަނީ ދުބާއީ ގައި ދިރިއުޅެމުންދާ ކެނެޑާއަށް އުފަން ގިއެދްރޭ ވަސްކައިޓެ (33އ.) ނަމަކަށް ކިޔާ އަންހެނެކެވެ.

ބޭރުގެ މީޑިއާއެއް ކަމުގައިވާ "ޚަލީޖް ޓައިމްސް" އަށް މައުލޫމާތު ދެމުން ބުނެފައިވަނީ ގިއެދްރޭ އަކީ ވަރަށް މޮޅު ފެތުންތެރިއެއްގެ އިތުރުން އެހާމެ މޮޅު އެތުލީޓެއް ކަމަށެވެ. އެހެންކަމުން އޭނާ ގެނބިދާނެ ކަމަށް ޤަބޫލު ނުކުރެވޭ ކަމަށް ވެސް ވަނީ ބުނެފައެވެ.

ގިއެދްރޭ ގެ ފިރިމީހާ ޕަރްމާރް ގުރްޝަރަންޖީތު  ބުނީ ޕޫލުގައި ދެ މީހުން ތިބުމަށްފަހު 3:30 ހާއިރު އޭނާގެ އަންހެނުން ދިޔައީ މޫދުގައި ފަތާލަން ކަމަށް ބުނެއެވެ. އަދި އޭގެފަހުން ޕަރްމާރް އަށްވެސް ކުޑަކޮށް ނިދުނީ ކަމަށާއި 6:30 ހާއިރު ހޭލެވުނުއިރު ވެސް ގިއެދްރޭ އެނބުރި އައިސްފައި ނުވާތީ އެކަން އެރިސޯޓުގެ މެނޭޖްމަންޓަށް އެންގިކަމަށް ބުނެފައިވެއެވެ.

ޕަރްމާރް ތުހުމަތު ކޮށްފައިވަނީ ރާއްޖޭގައި އުޅޭ ކަނޑުފޭރޭ މީހުން ގިއެދްރޭ ރަހީނު ކުރީ ކަމަށެވެ. ނަމަވެސް މިފަދަ ކަމެއް ފުލުހުންގެ ތަހުގީގަށް އަދި އެނގިފައެއް ނުވެއެވެ.

މި ދެމަފިރިން ޗުއްޓީ ހޭދަކުރަމުން އައީ ރ. އަތޮޅުގައި ތަރައްޤީ ކޮށްފައިވާ އިންޓަރ ކޮންޓިނެންޓަލް މޯލްޑިވްސް (މާމުނަގައު) ރިސޯޓުގައެވެ.

ގިއެދްރޭ ރަހީނު ކުރީ ކަމަށް ބެލެވޭ ކަމަށާއި އޭނާ ހޯދައިދޭ މީހަކަށް 1 ލައްކަ ޑޮލަރު ނުވަތަ 15 ލައްކައަށް ވުރެ ގިނަ ރުފިޔާ ދޭން އޭނާގެ އާއިލާ އިން ވަނީ ހުށަހަޅާފައެވެ.

ގެއްލުނުއިރު ގިއެދްރޭ ބަނޑުބޮޑު ކަމަށާއި ބަނޑަށް 8 މަސް ކަމަށް ވެސް ރިޕޯޓުތަކުން ބުނެފައިވެއެވެ.