ކޮވިޑް-19: އުސޫލާ ޚިލާފުވާ ތަންތަން 24 ގަޑިއިރަށް ބަންދު ކުރަނީ
މިހާރު ރާއްޖޭގައި ހަލުވި ކަމާއެކު ކޮވިޑް-19 ފެތުރެމުންދާތީ، އެކަން ކޮންްޓްރޯލު ކުރުމަށް ކަނޑައަޅާފައިވާ އުސޫލާ ހިލާފުވާ ތަންތަން 24 ގަޑިއިރަށް ބަންދު ކުރަން ނިންމާފައިވާ ކަމަށް ހެލްތު އެމާޖެންސީ އޮޕަރޭޝަން ސެންޓަރ (އެޗްއީއޯސީ) އިން ވިދާޅުވެއްޖެ އެވެ.
އެޗްއީއޯސީން މިރޭ ކުރިއަށް ގެންދިޔަ ނޫސްވެރިންގެ ބައްދަލުވުމުގައި ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ޑައިރެކްޓަރ އަހުމަދު ނާސިރު ވިދާޅުވީ ކޮވިޑް-19 އާއި ގުޅިގެން އަޅާފައިވާ ފިޔަވަޅުތަކަށް އެންމެހާ ފަރާތްތަކުން ބޯލަނބާތޯ މިދިޔަ ހަފްތާގައި މާސް އިންސްޕެކްޝަނެއް ފެށި ކަމަށެވެ.
އެގޮތުން މިއިންސްޕެކްޝަންގެ ތެރެއިން މާލެ ސަރަހައްދުގެ ކާބޯތަކެތީގެ ހިދުމަތް ދޭ ފަރާތްތަކާއި، ފިހަރާތަކާއި، ސެލޫންތައް އަދި ޖިމްތަކާއި މާރުކޭޓްތައް ވެސް ބަލައެވެ.
މި އިންސްޕެކްޝަންގެ ތެރެއިން، ފިޔަވަޅުތަކަށް ބޯ ނުލަނބާ ތަންތަނަށް ނޯޓިސްދީ ޖޫރިމަނާ ވެސް ކުރެއެވެ.
އެގޮތުން ފުރަތަމަ ދެނީ ވައިޓް ނޯޓިސް އެކެވެ. އެއީ ނަސޭހަތްތެރިވުމުގެ ގޮތުން ދޭ ނޯޓިސް އެކެވެ. ދެން ދެނީ ރެޑް ނޯޓިސް އެވެ. އެއީ ފިޔަވަޅު އަޅާނެ ކަމުގެ އިންޒާރެވެ. އޭގެ ފަހުން އެތަން ޖޫރިމަނާ ކުރެއެވެ.
ނަމަވެސް މިހާރު އެޗްޕީއޭއިން ވަނީ އެ އުސޫލު ބަދަލު ކޮށްފައެވެ. އެގޮތުން ނާސިރު ވިދާޅުވީ މިހާރު ތިން ވަަނަ މަރުހަލާގައި ޖޫރިމަނާ ކުރުމުގެ ބަދަލުގައި އެފަދަ ފަރާތްތައް 24 ގަޑިއިރަށް ބަންދު ކުރާ ގޮތަށް ހަމަޖެހިފައިވާ ކަމަށެވެ.
