ޝައިޚް އިލްޔާސާއި ޒައިދު،ޢިޔާޟްގެ ދިފާޢުގައި ، އަދާލަތު ޕާޓީގެ ސްޓޭންޑަކީ ސަސްޕެންޝަނާ ގުޅިގެން މައުލޫމާތު އާންމު ނުކުރުން!
މީޑިއާތަކުގެ އެންމެ ބޮޑު އެއް ޚަބަރަކަށް އިއްޔެ ވެގެން ދިޔައީ ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)ގެ އެސިސްޓެންޓް ޕްރޮފެސަރ ޑރ.ޢިޔާޟް ޢަބުދުއްލަތީފް މަގާމުން ސަސްޕެންޑް ކުރުމުގެ ޚަބަރެވެ. މީސްމީޑިއާގައި ޑރ،ޢިޔާޟް އާންމުކޮށްފައިވާ ބައެއް ވާހަކަތަކާ ގުޅިގެން އާންމުގެ ޝަކުވާ ލިބޭ ކަމަށް ބުނެ އެމްއެންޔޫއިން އެމަނިކުފާނު ސަސްޕެންޑްކޮށްފައި ވަނީ 14 ދުވަހުގެ މުއްދަތަކަށެވެ.
އެމްއެންޔޫގެ ވައިސް ޗާންސެލަރ މުޙައްމަދު ޝަރީފް މިކަން ދޮގު ކުރެއްވި ނަމަވެސް ޢިޔާޟް ވަނީ އެކަން ހިނގައިދިޔަ ގޮތް އާންމުކޮށް ހިއްސާ ކޮށްފައެވެ.
"އެއިރު ގާތްގަނޑަކަށް 3:00 ޖެހީ. އަޅުގަނޑު ދެންނެވިން 4:00 ޖަހާއިރު އެބައޮތޭ އަޅުގަނޑުގެ ކްލާހެއް، އެކްލާހަކީ ވަރަށް ގިނަ ރަށްރަށުން ދަރިވަރުން ބައިވެރިވެގެން އޮންލައިންކޮށް އޮންނަ ކްލާހެއް، އަޅުގަނޑު އެހިން އެކްލާސް ވެސް ހަމަ ނުނަގަންވީހޭ. ވިދާޅުވީ އެއްވެސް ކަމެއް ކުރާނެކަމެއް ނެތޭ، ޔުނިވާސިޓީއަށް އައިސްގެން ވެސް ނުވާނޭ. ކާޑު ޖަހާކަށް ވެސް ނުޖެހޭނޭ. އެއްވެސް ކަމެއް ކުރާކަށް ނުޖެހޭނޭ. 14 ދުވަހުގެ މުއްދަތަކަށް ސަސްޕެންޑު ވެފައޭ ތިހުރީ" ޑރ. ޢިޔާޟް "ދެން"އަށް ވިދާޅުވިއެވެ.
ޢިޔާޟް ވިދާޅުވީ އެމަނިކުފާނަކީ މެނޭޖްމަންޓްގެ އިސް މަގާމެއްގައި ހުރި ، ތަހުގީގަކަށް ނުފޫޒެއް ފޯރުވޭނެ ބޭފުޅެއް ނޫން ކަމަށާއި ، އެމަނިކުފާނާމެދު ތުހުމަތުތަކެއް އޮތް ނަމަވެސް ސަސްޕެންޑް ނުކޮށް ވެސް އެކަން ބެއްލެވޭނެ ކަމަށެވެ. އަދި ސަސްޕެންޑް ކުރުމުން އެންމެ ބޮޑު ގެއްލުމެއް ލިބިގެން ދިޔައީ ދަރިވަރުންނަށް ކަމަށް ވެސް ޢިޔާޟް ފާހަގަ ކުރެއްވިއެވެ.
ސަރުކާރު ހިންގާ ކޯލިޝަންގައި ހިމެނޭ އަދާލަތު ޕާޓީގެ ޕާޓީގެ މެމްބަރު ޑރ.ޢިޔާޟްގެ ސަސްޕެންޝަނާ ގުޅިގެން މީސްމީޑިއާގައި ގިނަ ބަޔަކު ދަނީ އެކަން ކުށްވެރި ކުރަމުންނެވެ. އެމަނިކުފާނުގެ ދިފާޢުގައި ބަސް އިއްވަމުންނެވެ. ހަމަމިއާއެކު އެމަނިކުފާނަށް ހުތުރު ތުހުމަތުތަކެއް ވެސް އައިސްފައި ވެއެވެ. އެގޮތުން އެމްޑީޕީގެ ޕީޖީ ލީޑަރު އަލީ އާޒިމް ވަނީ ޢިޔާޟް ހައްޔަރު ކުރުމަށް ގޮވާލާފައެވެ.
"ދިވެހި މުޖުތަމަޢުގެ އިތުރުން އިސްލާމީ އުއްމަތް ބައިބައިކުރަން ކުރަން މަސައްކަތްކުރާ މިފަދަ މުނާފިގުން ހައްޔަރުކޮށް އެކަހެރިކުރަން ގޮވާލަން ، މީނާ ދޫކޮށްފައި ބަހައްޓައިފިނަމަ އަންހެން ދަރީން މަރަން ވެސް ގޮވާފާނެ" ޢިޔާޟަށް ނިސްބަތްކޮށް އާޒިމް ޓްވީޓް ކުރައްވާފައި ވެއެވެ.
އަލީ އާޒިމްގެ މި ތުހުމަތުތަކާއި ޢިޔާޟްގެ ސަސްޕެންޝަނާ ގުޅިގެން ޢިޔާޟްގެ ދިފާއުގައި ޝެއިޚް އިލްޔާސާއި ޝައިޚް ޒައިދު ދަނީ ވާހަކަފުޅު ދައްކަވަމުންނެވެ.
ޝައިޚް އިލްޔާސް ވިދާޅުވެފައި ވަނީ ޢިލްމުވެރީންގެ އަގު ވައްޓާލާ އިލްމުވެރީންނާ ޖައްސާލުމަކީ ކޮންމެ ވެރިކަމެއްގައި ވެސް ހެދޭ އެންމެ ބޮޑު ގޯސް ކަމަށެވެ. އަދި ޢިޔާޟަށް ދެރައެއް ލިބުނަ ނުދެއްވާނެ ކަމަށް އިލްޔާސް ވިދާޅުވެފައި ވެއެވެ. މީގެ އިތުރުން ޢިޔާޟަކީ ލާދީނީ ވެރީން އެންމެ ޖެހިލުންވާ ދީނީ ޢިލްމުވެރިޔާ ކަމަށާއި އެމަނިކުފާނު ދެއްވާ ރައްދުތަކަށް ކެތް ނުކުރެވެނީ ކަމަށް އިލްޔާސް ފާހަގަ ކުރައްވާފައި ވެއެވެ.
އަދި ހަމައެހެންމެ މުނާފިގުންގެ ސިފަތަކަކީ ލޮބުވެތި ނަބިއްޔާ ޞައްލަﷲ ޢަލައިހި ވަސައްލަމަ ބަޔާން ކޮށްދެއްވާފައިވާ ސިފަތަކެއް ކަމަށާއި އެ ސިފަތައް ހުރީ ޑރ.ޢިޔާޟްގެ ތޯ ނުވަތަ މުނާފިގުންނަށް ގޮވާ މީހުންގެ ކިބައިގައިތޯ ދިވެހި ރައްޔިތުން ވިސްނާލުން މުހިންމު ކަމަށް އިލްޔާޟް ވިދާޅުވެފައި ވެއެވެ.
މި މައްސަލައާ ގުޅިގެން ޝައިޚް ޒައިދު ވިދާޅުވީ މަގާމަކީ ވަގުތީ އެއްޗެއްކަން އެމްއެންޔޫގެ ވެރީންނަށް ދަންނަވާ ކަމަށާއި މީހަކަށް ނުޙައްޤުން ދޭ އަނިޔާ އެބަޔަކާ އަރާ ހަމަކުރާނެ ކަމަށެވެ. އަދި ޢިޔާޟަކީ މުނާފިގެއް ކަމަށް ގޮވާލާ މީހުންގެ މުނާފިގުކަމުގެ ވާހަކަ ދައްކަވަން ބޭނުންފުޅު ނުވާކަން ފާހަގަ ކުރައްވާ "އެމްޑީޕީ ވަކަރުގޭ މީހުން" ދައްކާ ބިރަށް ފަހަތަށް ނުޖެހޭނެ ކަމަށް ވެސް ޒައިދު ވިދާޅުވެފައި ވެއެވެ.
މީގެ އިތުރުން އިތުބާރު ނެތްކަމުގެ ވޯޓް ނަގައި މަގާމުން ދުރުކުރި ކޮމިޔުނިކޭޝަން މިނިސްޓަރ މަލީޙް ވެސް ވަނީ ޢިޔާޟް ސަސްޕެންޑް ނުކުރެވޭނެކަމަށް ވިދާޅުވެފައެވެ.
"ޚިޔާލު ފާޅު ކުރުމުގެ މިނިވަންކަން ހަނިކުރަމުން ގޮސް ބަހެއް މީހާ ވަޒީފާއިން ވަކިކޮށް ސަސްޕެންޑްކޮށް މި ހަދަނީ ކޮން ގާނޫނެއްގެ ދަށުންތޯ؟ ދިވެހިން ހޯދި ޑިމޮކްރަސީގެ ދަންމަރު ނިއްވާލަން ބަޔަކު ހޭބޯ ނާރާ މަސައްކަތް ކުރޭ، ޑރ.ޢިޔާޟް ސަސްޕެންޑް ނުކުރެވޭނެ" މަލީޙް ވިދާޅުވެފައި ވެއެވެ.
އިޔާޟްގެ ސަސްޕެންޝަންއާ ގުޅޭ ގޮތުން އަދާލަތު ޕާޓީއަށް ނިސްބަތްވާ ޢިލްމުވެރީން ވަކިވަކިން ވާހަކަފުޅު ދެއްކެވި ނަމަވެސް މި ސަރުކާރުގެ ހޯމް މިނިސްޓަރ އިމްރާން އަބްދުﷲ ރައީސްކަން ކުރައްވާ އަދާލަތު ޕާޓީގެ ސްޓޭންޑަކީ އެ މައްސަލައާ ގުޅޭ ގޮތުން އާންމުކޮށް ވާހަކަ ނުދެއްކުމެވެ.
"ދެން"އާ ވާހަކަ ދައްކަވަމުން އެ ޕާޓީގެ ތަރުޖަމާނު ޝައިޚް ޢަބުދުﷲ ރަޝީދު ވިދާޅުވީ ޑރ.ޢިޔާޟްގެ ސަސްޕެންޝަނާ ގުޅިގެން މަސައްކަތްތަކެއް ކުރައްވަމުން ގެންދަވާ ކަމަށާއި ނަމަވެސް އެކަން ހިއްސާ ނުކުރުމަށް ނިންމާފައިވާ ކަމަށެވެ. އަދި އެ މަސައްކަތް "ވަކި ހިސާބަކަށް ދިޔުމަށްފަހު މީޑިއާއާ ހިއްސާ ކުރައްވާނެ"ކަމަށް ޢަބުދުﷲ ރަޝީދު ވިދާޅުވިއެވެ.
