ކާޑުގެ ބާވަތްތަކުގެ އަގު ކޮންޓްރޯލް ކޮށްފި

މިނިސްޓްރީ އޮފް އިކޮނޮމިކް ޑިވެލޮޕްމަންޓުން ކާޑުގެ ބާވަތްތަކުގެ އަގު ކޮންޓްރޯލް ކޮށްފިއެވެ.

Ads by STELCO

އެމިނިސްޓްރީން މިއަދު ކުރި އިއުލާނެއްގައި ބުނެފައި ވަނީ ޤާނޫނު ނަންބަރު 1/96 (މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ޙިމާޔަތް ކުރުމުގެ ޤާނޫނު) 28 ފެބްރުއަރީ 2021 ގައި އުވި، ޤާނޫނު ނަންބަރު 12/2020 (މުދާ ގަންނަ ފަރާތްތަކާ ޚިދުމަތް ލިބިގަންނަ ފަރާތްތައް ހިމާޔަތް ކުރުމުގެ ޤާނޫނު) އަށް ޢަމަލު ކުރަން ފަށާފައިވާތީ، އެޤާނޫނުގެ 65 ވަނަ މާއްދާގެ (ހ) ގެ ދަށުން މުދާ ވަކިވަކިން (ރީޓެއިލްކޮށް) ވިއްކޭނެ އެންމެ މަތީ އަގު ކޮންޓްރޯލް ކޮށްފައިވާ ކަމަށެވެ.

އެގޮތުން ކާޑުގެ ބާވަތްތަކުގެ ތެރެއިން އާދައިގެ ހަނޑޫ ކިލޯއެއް މިހާރު ވިއްކޭނެ އެންމެ މަތީ އަގަކީ ކިލޯއެއް 4ރުފިޔާ 80 ލާރިއަށެވެ. އަދި އާދައިގެ ހުދު ހަކުރު ކިލޯއެއް 4ރުފިޔާ 82 ލާރިއަށް ވިއްކަން އަންގާފައިވާއިރު، އާދައިގެ ފުއް ކިލޯއެއް 3ރުފިޔާ 80 ލާރިއަށެވެ.

އިކޮނޮމިކް މިނިސްޓްރީން ބުނެފައި ވަނީ، އެހެން ނަމަވެސް ރާއްޖޭގެ ތަފާތު ސަރަޙައްދުތަކުގައި ކާޑުގެ ބާވަތްތައް ވިއްކުމަށް ޚަރަދުގެ ގޮތުގައި (ނާލާއި، މަޖޫރީ އަދި ފައިދާ ހިމަނައިގެން) މަތީގައި ބަޔާން ކޮށްފައިވާ އަގުގެ މައްޗަށް ކިލޯއަކަށް ގިނަވެގެން މި އަދަދު އިތުރު ކުރެވޭނެ ކަމަށެވެ.

▪︎ ހއ، ހދ، ށ: ކިލޯއަކަށް 1 ރުފިޔާ 2 ލާރި.
▪︎ ނ، ރ، ބ، ޅ، ކ، އއ، އދ، ވ، މ، ފ، ދ، ތ: ކިލޯއަކަށް 82 ލާރި
▪︎ ލ، ގއ، ގދ، ޏ، ސ: ކިލޯއަކަށް 1ރުފިޔާ 21 ލާރި

ކާޑުގެ ބާވަތްތަކުގެ އަގުގެ ކޮންޓްރޯލު އަގަށްވުރެ ބޮޑުކޮށް މުދަލެއް ވިއްކައިފިނަމަ، އެފަރާތެއް ޤާނޫނު ނަންބަރު 12/2020 (މުދާ ގަންނަ ފަރާތްތަކާ ޚިދުމަތް ލިބިގަންނަ ފަރާތްތައް ހިމާޔަތް ކުރުމުގެ ޤާނޫނު) ގެ 84 ވަނަ މާއްދާގެ ދަށުން ފިޔަވަޅު އެޅޭނެ ކަމަށް ވެސް އެމިނިސްޓްރީން ބުނެފައިވެއެވެ.