ހުޅުމާލެ ދެ ފުލެޓަކުން ވަގަށް ނަގާފައިވާ ތަކެއްޗާއެކު ދެ މީހަކު ހައްޔަރުކޮށްފި
ހުޅުމާލެ ކޮރަލް ވިލް ދެ ފުލެޓަކުން ވަގަށް ނަގާފައިވާ ގިނަ އަދަދެއްގެ ތަކެއްޗާއެކު ދެ މީހަކު ހައްޔަރު ކޮށްފިއެވެ.
ހުޅުމާލެ ޕޮލިސްއަށް ރޭ ހުށަހެޅުނު ވައްކަމުގެ ދެ މައްސަލައަކާ ގުޅިގެން ހައްޔަރު ކޮށްފައި ވަނީ 20 އަހަރުގެ ދިވެހި ފިރިހެނަކާއި 23 އަހަރުގެ ދިވެހި ފިރިހެނެކެވެ.
އެ ދެ މީހުންގެ ތެރެއިން 23 އަހަރުގެ މީހާ ހައްޔަރު ކޮށްފައި ވަނީ ހުޅުމާލެ ޕޮލިސްގެ ފުލުހުން ޕެޓްރޯލް ކުރުމުގެ ތެރެއިން، ހުޅުމާލެ ޒެންއާރު ކުރިމަތީ އަތިރިމަތިންނެވެ. އަދި 20 އަހަރުގެ މީހާ ވެސް ހައްޔަރު ކޮށްފައި ވަނީ އެސަރަހައްދުން ހިނގާފައި ދަނިކޮށެވެ.
އެ ދެ މީހުން ހައްޔަރުކޮށް އެ ދެ މީހުންނާއި، އެ މީހުން ގެންގުޅުނު ތަކެތި ބަލައި ފާސްކުރިއިރު ވަގަށް ނަގާފައިވާ ކަމަށް ބެލެވޭ ތަކެތި ފެނިފައި ވެއެވެ. އެގޮތުން، ލެޕްޓޮޕާއި، އައިޕެޑް އަދި މޯބައިލް ފޯނުތަކަކާއި ސްމާޓް ވޮޗްއާއި އެއަރޕޮޑުގެ އިތުރުން ރަނާއި ރިހި އަނގޮޓިތަކަކާއި ފަށް ތަކަކާއި ކެވެލިތަކެއް ފެނިފައި ވެއެވެ. އަދި ފައިސާއާއި ގޭތެރޭގައި ބޭނުންކުރާ އެހެނިހެން ތަކެތި ވެސް ފެނިފައިވެއެވެ.
މި މައްސަލަ ހުޅުމާލެ ޕޮލިހުން ދަނީ ތަހުގީގު ކުރަމުންނެވެ.
