މަސްތުވާތަކެތީގެ ފައިސާގައި ޝާމިލުވާ މީހުންނަށް މަނީލޯންޑަރިންގެ ދައުވާ ކުރަނީ
މަސްތުވާތަކެތީގެ ވިޔަފާރިކޮށް، އޭގެ ފައިސާގައި ޝާމިލުވާ ފަރާތްތަކަށް މަސްތުވާތަކެތި ޓްރެފިކް ކުރުމުގެ ދައުވާގެ އިތުރުން މަނީ ލޯންޑަރިންގެ ދައުވާ ވެސް ކުރަން ނިންމާފައިވާ ކަމަށް ޕްރޮސިކިއުޓާ ޖެނެރަލް ހުސައިން ޝަމީމް ވިދާޅުވެއްޖެއެވެ.
މަސްތުވާތަކެތި ވިއްކާ މީހުންނާއި އެ ވިޔަފާރީގައި ޝާމިލުވާ މީހުންނާ މެދު ދައުވާ ކުރަން ފެށުމަކީ މަސްތުވާތަކެތީގެ މައްސަލަ ހައްލުކުރުމަށް ފެށޭ ފެށުމެއް ކަން ފާހަގަކުރައްވައި ޕީޖީގެ އަމިއްލަ ބްލޮގްގައި ލިޔުއްވި ލިޔުމެއްގައި ވިދާޅުވީ މި ގޮތުން މީގެ ފުރަތަމަ މައްސަލަ މި މަހުގެ 18 ވަނަ ދުވަހު ކޯޓަށް ހުށަހެޅިފައިވާ ކަމަށެވެ.
"މަނީ ލޯންޑްރިންގެ ކުށް ފުރިހަމަވުމަށްޓަކައި ބޭނުން ވަނީ، އޭނާއަށް ލިބި، ބޭނުންކުރި ފައިސާއަކީ، ކުށެއް ކޮށްގެން ހޯދާ ފައިސާކަން އޭނާއަށް ޝައްކުވުމެވެ. ކަނޑައެޅިގެން އެނގުން ވެސް ލާޒިމެއް ނޫނެވެ. މަސްތުވާތަކެތީގެ ވިޔަފާރި ކުރާ މީހެއްގެ އަނތްބަކު، އޭނާގެ ފިރިމީހާ ފައިސާ ހޯދާ ތަނެއް ނޭނގޭކަމަށް ބުނުމަކީ އަޅުގަނޑަށް ގަބޫލުކުރަން ދަތި ކަމެކެވެ. ފައިސާ ލިބޭ ގޮތް ނޭނގޭކަމަށް ބުނާއިރު، އެފައިސާ، ޝައްކު އުފެދޭ ކަންކަމަށް ބޭނުންކޮށްފައި ހުރިކަން ތަހުގީގަށް ފެނެއެވެ،" ޝަމީމް ލިޔުއްވާފައިވެއެވެ.
އެގޮތުން އެ ބާވަތުގެ ފުރަތަމަ މައްސަލައިގައި މި މަހުގެ 18 ވަނަ ދުވަހު ދައުވާކުރުމަށް ކްރިމިނަލް ކޯޓަށް ވަނީ ހުށަހަޅާފަ އެވެ. ކޯޓަށް ހުށަހެޅީ މިދިޔަ ޖެނުއަރީ މަހުގެ 12 ވަނަ ދުވަހު ރާއްޖެއަށް މަސްތުވާތަކެތި އެތެރެކޮށް އެތަކެތި ބޭނުންކޮށް ގެންގުޅެ އެތަކެތި ޓްރެފިކްކުރާކަމަށް ތުހުމަތު ކުރެވިގެން މާލޭގެ ހަތަރު ގެއެއް ބަލައި ފާސްކޮށް ފުލުހުން ހިނގި އޮޕަރޭޝަންގައި ގިނަ އަދަދެއްގެ މަސްތުވާތަކެތި ފެނުނު މައްސަލައިގައެވެ. މި މައްސަލަ އުފުލާފައި ވަނީ ގދ. ތިނަދޫ، ރަންގަލް، ޙަސަން ލޫޠްއާއި، ހުޅުމާލެ ފްލެޓް ނަންބަރު 01-ޖީ-45، ޙަސަން ރަޝީދާއި، ތ. ތިމަރަފުށި، ވައިޓްރޯސް، އިސްމާޢީލް ޝަރީފްއާއި، މއ. ހަސްލަތު، ޝަނިޔާ އިބްރާހީމް، ގެ މައްޗަށެވެ.
މަނީ ލޯންޑްރިން އަދި ޓެރަރިޒަމް ފައިނޭންސްކުރުން ހުއްޓުވުމުގެ ގާނޫނުގެ 7 ވަނަ މާއްދާގެ (ނ) ބުނާ ގޮތުން، މަސްތުވާތަކެތި ޓްރެފިކް ކުރުމުގެ ކުށަކީ، އެކުށާ ގުޅިގެން މަނީ ލޯންޑްރިންގެ ދައުވާ ކުރެވޭނެ ކުށެކެވެ. އެ ގާނޫނުގެ ދަށުން، މަސްތުވާތަކެތި ވިޔަފާރި ކުރާކަމަށް ތުހުމަތުކުރެވޭ މީހުންނާއި، އެމީހުންގެ އަނބިންނާއި ފިރިންނާއި، ގާތްތިމާގެ މީހުންވެސް، ފައިސާ ގެންގުޅުމުގައި ބައިވެރިވެއްޖެނަމަ ދައުވާ ކުރެވޭނެއެވެ.
Ads by STO
