ބޮޑު ޚިޔާނާތުގެ ތަހުގީގު ނިންމާލަން މަދުވެގެން އަހަރަކަށްވުރެ ގިނަ ދުވަސް ނަގާފާނެ: އޭސީސީ
ރާއްޖޭގައި ފަހުގެ ތާރީޚެއްގައި ހިނގާފައިވާ އެންމެ ބޮޑު ޚިޔާނާތް ކަމުގައިވާ އެމްއެމްޕީއާރްސީ ބޮޑު ޚިޔާނާތުގެ ތަހުގީގު ނިންމޭނެ ސީދާ ތާރީޚެއް ދަންނަވަން ދަތިކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.
އޭސީސީން ބުނީ އެޚިޔާނާތުގެ ތަހުގީގު ނިންމާލުމަށް އެންމެ މަދުވެގެން ވެސް އަހަރަކަށްވުރެ ގިނަ ދުވަސް ނަގާފާނެ ކަމަށެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި މެންބަރުން ކުރެއްވި ސުވާލުތަކަށް މިއަދު ޖަވާބުދެއްވަމުން އޭސީސީގެ މެންބަރުން ބުނީ، އެމްއެމްޕީއާރުސީގެ ކޮރަޕްޝަންގެ މައްސަލަތަައް ބެލުމަށްވެސް އިންވެސްޓިގޭޓަރުންގެ ވަކިޓީމެއް އެކުލަވާލައި މައްސަލަތައް ވީއެންމެ އަވަހަކަށް ނިންމުމަށް އެކޮމިޝަނުން މަސައްކަތް ކުރަމުން ގެންދާ ކަމަށެވެ.
މިމައްސަލަތައް ނިންމޭނެ ސީދާ މުއްދަތަކާއި ގުޅޭގޮތުން މެންބަރަކު ސުވާލު ކުރުމުން އޭސީސީގެ މެންބަރު އިބްރާހިމް ޝަކީލް ވިދާޅުވީ އެމްއެމްޕީއާރުސީގެ ބޮޑު ޚިޔާނާތާ ގުޅުންހުރި ބައެއް މީހުން ތަޙުގީގުތައް ނިންމައި މިހާރުވެސް ދަޢުވާކުރަން ފޮނުވައި ކޯޓު މަރުހަލާއަށްވެސް ގޮސްފައިވާކަމަށެވެ.
ނަމަވެސް މިމައްސަލައިގައި ހިމެނޭ އެންމެންގެ ތަހުގީގުތައް ނިންމާލެވޭނެ ވަކި މުއްދަތެއް ވިދާޅުވާން އަދި ދަތިކަމަށް ވެސް ޝަކީލް ވިދާޅުވިއެވެ.
