ފްރޮންޓްލައިން އެލަވަންސް ދިނުން އަވަސް ކުރުމަށް ގޮވާލައި މަޖިލީހަށް ވެއްދި ކުއްލި މައްސަލަ ބޭރުކޮށްލައިފި
ކޮވިޑް-19އާ ދެކޮޅަށް ފްރޮންޓްލައިންގައި މަސައްކަތްކުރާ ފަރާތްތަކަށް ސަރުކާރުން ދޭން ނިންމި އެލަވަންސް އަދިވެސް ދީފައި ނުވާތި އެކަން އަވަސް ކުރުމަށް ގޮވާލައި ރައްޔިތުންގެ މަޖިލީހަށް ވެއްދި ކުއްލި މައްސަލަ ބޭރުކޮށްލައިފި އެވެ.
މި ކުއްލި މައްސަލަ މަޖިލީހަށް ވެއްދީ ނައިފަރު ދާއިރާގެ މެމްބަރު އަހުމަދު ޝިޔާމް އެވެ. މި މައްސަލަ ބަލައިގަތުމަށް ވޯޓު ދެއްވީ 8 މެމްބަރުން ކަމަށްވާއިރު، ނުފެންނަ ކަމަށް 14 މެމްބަރުން ވަނީ ވޯޓު ދެއްވާފައެވެ.
މައްސަލައިގަ ބުނެފައިވަނީ ކޮވިޑް-19އާ ގުޅިގެން ފްރަންޓްލައިންގައި މަސައްކަތްކުރާ ފަރާތްތަކަށް ޚާއްސަ އެލަވަންސެެއް ދޭނެ ކަމަށް ސަރުކާރުން އިޢުލާންކޮށްފައިވީ ނަމަވެސް މިހާތަނަށް އެއްވެސް ފަރާތަކަށް މި އެލަވަންސް ނުލިބި އެތައް ދުވަހެއް ފާއިތުވެގެން ގޮސްފައިވާކަމަށެވެ.
މިއެލަވަންސް ތިން ގިންތިއަކަށް ބަހާލައިގެން އެފަރާތްތަކަށް ދެއްވާނެ ކަމަށް، މެއި މަހުގެ 7 ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި މިކަން އިޢުލާން ކުރައްވަމުން، ފިނޭންސް މިނިސްޓަރ އިބްރާހީމް އަމީރު ވިދާޅުވެފައިވާ ކަމަށާއި އެގޮތުން އެންމެ ހައިރިސްކް، ފަރާތްތަކަށް ކޮންމެ ދުވާލަކަށް، 500 ރުފިޔާ، ދެވަނަ ގިންތީގެ ފަރާތްތަކަށް ދުވާލަކަށް 250 ރުފިޔާ އަދި އެންމެ ލޯ ރިސްކް ފަރާތްތަކަށް ދުވާލަކަށް 200 ރުފިޔާ ދެވޭނެ ކަމަށް ވިދާޅުވެފައިވާ ކަމަށެވެ.
ނަމަވެސް މިއަދާއި ހަމައަށްވެސް މިއެލަވަންސް ލިބިފައި ނުވާތީ، ކޮވިޑް-19އާ ގުޅިގެން ފްރަންޓްލައިންގައި މަސައްކަތް ކުރެއްވި ޑޮކްޓަރުންނާއި، ނަރުހުންނާއި، ޞިއްޙީ އެހީތެރިންނާއި، ފުލުހުންނާއި، ސިފައިންނާއި، އެއަރލައިންތަކުގެ މުވައްޒަފުންނާއި، އަދިވެސް އެހެނިހެން ދާއިރާތަކުންވެސް މިކަމުގައި ޙަރަކާތްތެރިވި ފަރާތްތަކުން ރައްޔިތުންނާއި ޤައުމަށްޓަކައި ފުރާނަ އަތްމައްޗަށްލައިގެން ވަރަށް ބޮޑު ޤުރުބާނީއެއް ވެފައިވާ ހިނދު، އެފަރާތްތަކަށް ލިބެންޖެހޭ އެލަވަންސް ވީހާވެސް އަވަހަށް ދިނުމަށް ގޮވާލާކަމަށް ޝިޔާމް ވިދާޅުވިއެވެ.
