ޑރ. ނިޔާފަށް ރައްދުކޮށް ބަހެއް ބުނެވޭނެ ޚިދުމަތްތެރިއަކު މަޖިލީހުގައި އެބަހުރިތޯ؟: ޑރ. ހަބީބް
ޑރ. އަލީ ނިޔާފަށް ރައްދުކޮށް ބަހެއް ބުނެވޭނޭ ޚިދުމަތްތެރިއަކު ރައްޔިތުންގެ މަޖިލީހުގައި އެބަހުރިތޯ، ރާއްޖޭގެ ފުރަތަމަ ދިވެހި ކަށީގެ ޑޮކްޓަރު ޑރ. މުޙައްމަދު ހަބީބު ސުވާލު ކުރައްވައިފިއެވެ.
އާއްމު ސިއްޙަތުގެ ބިލަށް އިސްލާހު ގެންނަން ހުށަހެޅި ބިލާއި ގުޅިގެން ޑރ. ނިޔާފް ރައްޔިތުންގެ މަޖިލީހުގައި ދެއްކެވި ބައެއް ވާހަކަފުޅުތަކާއި މަޖިލިސްގެ ބައެއް މެންބަރުން ވަނީ ހިތްހަމަނުޖެހި ފާޑު ވިދާޅުވެފައެވެ.
އެ އިސްލާހުގައި ބުނެފައިވަނީ ސިއްހީ ކުއްލި ނުރައްކާ އިއުލާނުކުރުމަށް ގަރާރު ނެރޭތާ 48 ގަޑިއިރު ތެރޭގައި މަޖިލީހަށް ހުށަހަޅަން ޖެހޭނެ ކަމަށެވެ.
އެބިލަށް އާއްމުންގެ މަޝްވަރާ ހޯދުމަށް މަޖިލިސް އިދާރާގައި ބޭއްވި ބައްދަލުވުމުގައި ވާހަކަ ދައްކަވަމުން ޑރ. ނިޔާފް ވިދާޅުވީ ސިއްހީ ކުއްލި ނުރައްކާ އިއުލާނުކޮށްފައި އޮންނަ ހާލަތެއްގައި ވިޔަސް އާންމުކޮށް މަޖިލީހުގެ ޖަލްސާ ބާއްވާ އުސޫލުން މަޖިލީހުން ބޭނުންވާ ތަނެއްގައި ޖަލްސާ ބޭއްވޭ ގޮތަށް ހިމަނަން އޮތުމަކީ ކަންބޮޑުވާ ކަމެއް ކަމަށާއި މިސްކިތެއް ހުއްޓުވޭ ހާލަތަކަށް ދެވެންޏާ ރައްޔިތުންގެ މަޖިލިސް ވެސް ހުއްޓުވޭނެ ހާލަތަކަށް ނުދާންވީ އެއްވެސް ސަބަބެއް ނެތް ކަމަށެވެ.
ޑރ. ނިޔާފް ގެ އެވާހަކަތަކަށް އަމާޒުކޮށް ރައްޔިތުންގެ މަޖިލިހުގެ އިހަވަންދޫ ދާއިރާގެ މެންބަރު މުޙައްމަދު ޝިފާއު ކުރެއްވި ޓްވީޓެއްގައި ސުވާލު ކުރައްވާފައިވަނީ މަޖިލީހާއި މާބޮޑަށް އަޅައިގަނެގެން އުޅުއްވަނީ ކީއްވެގެންތޯ އާއި ބަޔަކު ގައުމީ ހިދުމަތުގައި ތިބުމުން އެކަން ހަޖަމް ނުވަނީތޯއެވެ.
ޑރ. ނިޔާފްގެ ދިފާއުގައި ޑރ. ހަބީބް ވިދާޅުވެފައިވަނީ، ޑރ. ނިޔާފަކީ ރެއާއި ދުވާލު އިންސާނީ ޚިދުމަތުގައި ހުންނެވި ރާއްޖޭގެ ހަމައެކަނި ނިއުރޯސާޖަން ކަމަށެވެ.
"ޑރ.ނިޔާފަކީ އެތައް ދިވެހި ދަރީންގެ ފުރާނަ ސަލާމަތް ކޮށްދެއްވާފައިވާ، އަދި ކޮށްދެއްވަމުން ގެންދަވާ ބޭފުޅެއް. ހަޖަމު ނުވަނީ ކޮން ބަޔަކަށްކަން މިހާރު އޮޅިއްޖެ!" ޑރ. ހަބީބު ވިދާޅުވިއެވެ.
Ads by STO
