މިނިސްޓަރު އިމްރާންގެ އޯޑިއޯއާއި ރުގްޔާ ކުރާ ވީޑިއޯގެ ހަގީގަތް ހާމަކުރުމަށް ރާއީ ގޮވާލައްވައިފި
ހޯމް މިނިސްޓަރު އިމްރާން އަބްދުﷲ އަންހެންނަކަށް ޖިންސީ ގޯނާ ކުރި ކަމަށް ބުނެ ދައުރުވާ އޯޑިއޯ އާއި ރުގްޔާ ކުރައްވާ މަންޒަރު ފެންނަ ވީޑިއޯގެ ހަގީގަތް ހާމަކޮށް ދިނުމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ގޮވާލައްވައިފިއެވެ.
މިނިސްޓަރު އިމްރާން އަންހެނެއްގެ އުރަމަތީގައި ހިފައި އަނިޔާ ކުރާ ކަމަށް ބުނާ އޯޑިއޯއެއް މިދިޔަ ހަފްތާ ތެރޭގައި މީސް މީޑިއާގައި ވަނީ އާންމު ވެފައެވެ. އެ އޯޑިއޯގެ ސައްހަކަން ފުލުހުން ދަނީ ބަލަމުންނެވެ. އެކަމަކު، އިމްރާނަށް ސިހުރު ޖެހުނު ކަމަށް ބުނާ މައްސަލައާ ގުޅިގެން އިމްރާނާއި އަދާލަތު ޕާޓީން މިހާތަނަށް އެއްވެސް އެއްޗެއް ހާމަކޮށްފައެއް ނުވެއެވެ.
ވަގުތީ ކައުންސިލްތައް ހިންގުމުގެ ވަގުތީ ގާނޫނުގައިވާ ލޯކަލް ގަވަރުމަންޓް އޮތޯރިޓީ(އެލްޖީއޭ) ގެ ބޯޑު ހިންގާ ގޮތް އިސްލާހު ކުރުމަށް ހުށަހެޅިފައިވާ ބިލަށް ބަހުސް ކުރައްވަމުން ރާއީ ވިދާޅުވީ އިމްރާންގެ ވާހަކަތައް ކިޔައިދޭ އޯޑިއޯއާއި އިމްރާންގެ ފެންނަ ވީޑިއޯއާއި ގުޅޭ ގޮތުން އިމްރާން އެއްވެސް އެއްޗެއް ވިދާޅުނުވެ ވަމުންދާ ގޮތް ސާފުކޮށް ނުދޭތީ ވަރަށް ބޮޑަށް ކަންބޮޑުވެވަޑައިގަންނަވާ ކަމަށެވެ.
އެކަމާ ގުޅިގެން ދިވެހި ގިނަ ރައްޔިތުން ވެސް ސުވާލުތައް އުފައްދާ ކަމަށާއި އިމްރާނަށް ދިމާވާ ކަންތައްތައް ހާމަކުރަން ޖެހޭ ކަމަށް ވެސް ރާއީ ވިދާޅުވިއެވެ.
"މިއީ އާދައިގެ ކަންތައްތަކެއް ނޫން. މިއީ ދިވެހި ރައްޔިތުން ސުވާލު އުފައްދާ ކަންކަން. މި ކަންތައްތައް ސާފުކޮށްދޭން އެބަ ޖެހޭ. ސަރުކާރުގެ ވަޒީރަކާއި މެދު މި ސުވާލުތައް އުފެދެމުން މިދަނީ. ވީމާ ވަރަށް އާދައިގެ ބޭފުޅުންނަށްވެސް އެނގޭ ބުއްދި އާއި ސަލާމަތާއި ހަމައަށް ހުންނަން ޖެހޭކަން ވަޒީރުކަން ކުރަންޏާމު." ރާއީ ވިދާޅުވި އެވެ.
ރާއީ ވިދާޅުވީ އެ ހުރިޙާ ކަމެއްވާއިރު އަދާލަތު ޕާޓީއިން ވެސް އެކަން ސާފުކޮށް ނުދޭތީ ކަންބޮޑުވެވަޑައިގަންނަވާ ކަމަށާއި މަކަރާއި ހީތަލުން ވަޒީރު ކަމުގައި ހުރެގެން ނުވާނެ ކަމަށެވެ.
Ads by STO
