މޫނު ރީތިކުރަން ބޭނުން ކުރަންވީ އެއްޗެހި ކިޔައިދެވިއްޖެ، މިފަހަރު މިއޮތީ ބޭނުން ނުކުރަންވީ އެއްޗެހި!
ރީތި އޮމާން މޫނެއް ބޭނުން ނުވާނީ ކާކުހެއްޔެވެ؟ އެންމެން މިކަމަށް އެއްބަސް ނުވިޔަސް، ހަމަޔަގީނުން ވެސް މިއީ ހަމަ ކޮންމެ މީހަކުވެސް ބޭނުންވާނެ ކަމެކެވެ.
ހަންގަނޑު ރީތި ކުރަން ބޭނުން ކުރެވިދާނެ އެއްޗެހި ބުނެދެވިފައިވާއިރު، މޫނުމަތި ރީތިކުރުމުގެ ނިޔަތުގައިވެސް ބޭނުން ނުކުރުމަށް ސަމާލުކަން ދޭންވީ އެއްޗެހި އެބަހުއްޓެވެ.
އޭގެ ތެރެއިން ބައެއް އެއްޗެއްސަކީ:
▪︎ ސައިބޯނި
ސައިބޯންޏަކީ މޫނުގައި ހާކަން އެއްގޮަތަކަށް ވެސް ރަނގަޅު އެއްޗެއް ނޫނެވެ. މޫނުމަތީގައި ސައިބޯނި ހާކަންޏާ މޫނުގެ ހަންގަނޑު ހިކި، ކުރަކިވެ، އަވަހަށް ރޫޖެހުމަށް ވެސް މަގުފަހިވެއެވެ. އެހެންކަމުން މޫނުގެ ހަންގަނޑު އޮމާންކުރަން ބޭނުންނަމަ މޫނު ދޮންނަން ސައިބޯނި ބޭނުން ނުކުރާށެވެ.
▪︎ ލުނބޯ
މިއީ ހަންގަނޑު ރީތި ކުރުމަށް ވެސް ބައެއް މީހުން މޫނުގައި ހާކާ އެއްޗެކެވެ. ނަމަވެސް ލުނބޮލަކީ ހުހަށް މޫނުމަތީގައި ހާކަން އެއްގޮތަކަށް ވެސް ރަނގަޅު އެއްޗެއް ނޫނެވެ. ލުނބޯ ހުތުގައި ހުންނަ ސައިޓްރިކް އެސިޑްގެ ސަބަބުން ވަރަށް ފަސޭހައިން މޫނުމަތީގެ ހަންގަނޑު ހަލާކު ކޮށްލާނެއެވެ.
▪︎ ހޫނުފެން
މޫނު ދޮންނަން ބައެއް ފަހަރު އަހަރުމެން ހޫނު ފެން ބޭނުން ކުރަނީ މޫނުމަތި ރީތި ވާނެ ކަމަަށް ހީކޮށެވެ. ނަމަވެސް ހަގީގަތުގައި ހޫނުފެނުން މޫނު ދޮންނަ ނަމަ މޫނުގެ ހަންގަނޑު ހިކޭލެއް އަވަސްވެއެވެ.
▪︎ ލޯޝަން
ބައެއް މީހުންނަކީ މޫނުމަތީގައި ކްރީމް އަދި މޮއިސްޗުރައިޒާރ ހޭކުމުގެ ބަދަލުގައި ލޯޝަން ހާކާމީހުންނެވެ. ނަމަވެސް މިއީ ކަނޑުވާލަންވީ އާދައެކެވެ. ލޯޝަންގައި ހިމެނޭ ތެލުގެ ސަބަބުން މޫނުމަތީގައި ބިހިނެގުން ފަދަ ކަންކަމާއި ކުރިމަތިލާން ޖެހެއެވެ.
