ކޮވިޑަށް ކަސޯޓީ ނުހުއްޓުވުން، މިހާރު ތަރިން ޝޫޓު ކުރަނީ ގޭގައި އަމިއްލައަށް!
އިންޑިއާގައި ކޮވިޑް-19 ހަލުވިކަމާއެކު ފެތުރުމާއި ގުޅިގެން މަޝްހޫރު ޓީވީ ސީރީޒް "ކަސޯޓީ ޒިންދަގީ ކޭ" ގެ ޝޫޓިންގ މެދުކަނޑާލުމަށްފަހު އަލުން ފަށައިފިއެވެ.
ނަމަވެސް މިފަހަރު އެސީރީޒްގެ މަސައްކަތް ކުރިއަށް ދަނީ އޭގައި އުޅޭ ތަރިންގެ އަމިއްލަ ގޭގައި، އަމިއްލައަކަށް ޝޫޓު ކޮށްގެނެވެ.
ސީރީޒްގައި "ޕްރޭނާ" ގެ ރޯލު ކުޅޭ ލީޑް އެކްޓްރެސް އެރިކާ ފަރނަންޑެސް އާއި "ކޮމޮލިކާ" ގެ ރޯލު އަދާކުރާ އާމްނާ ޝަރްމާ ވެސް ވަނީ މިފަދައިން ސީރީޒްގެ މަސައްކަތް ކުރާކަން ހާމަކޮށްފައެވެ.
"މުމްބައި މިރޯ" އަށް މައުލޫމާތު ދެމުން އެރިކާ ބުނީ އޭނާ ކުރިން ކޮވިޑް އަށް ޓެސްޓު ކުރި ކަމަށާއި ނަތީޖާއިން ދެއްކީ ނައްސި ކަމަށެވެ. އޭގެ 10 ދުވަސް ފަހުން އަލުން ޓެސްޓު ކުރަން ނިންމައިގެން ހުއްޓާ ސީރީޒްގެ ޝޫޓިންގ ފެށިކަމަށާއި ނަމަވެސް ޕާތު މަންތާން (އަނޫރާގް) ކޮވިޑަށް ފައްސިވުމުން ޝޫޓިން އަނެއްކާވެސް ހުއްޓާލަން ޖެހުނީ ކަމަށް ވެސް އެރިކާ ބުންޏެވެ.
"ޝޫޓިންގ ފެށިފައިވުމުން ކޮންމެހެނެއް ވިޔަސް ނެތް ޝޫޓު ނުކޮށް ތިބެވޭކަށް. އެހެންވެ ދެން ގަސްދުކުރީ މިގޮތަށް ގޭގައި ޝޫޓު ކުރަން. މިގޮތަށް ގޭގައި ޝޫޓު ކުރުމަކީ ފަސޭހަކަމެއް ނޫން. އެކަމަކު ކުރިން އަމިއްލަ އޮންލައިން ޗެނަލެއްގައި މަސައްކަތް ކޮށްފައި ހުރުމުން އަހަންނަށް އެނގޭ ލައިޓިންގ ބަހައްޓާނެ ގޮތާއި، ކެމެރާ ކުރަންށާ އަމިއްލައަށް ތައްޔާރުވާން ވެސް. ހަމައެކަނި ދިމާވާ ދަތިކަމަކީ ކުރިމަތީގައި ކޯސްޓާރެއް ނެތުން. އެހެންވެ އެމީހަކު ދޭނެ އެކްސްޕްރެޝަނެއް އަމިއްލައަށް ވިސްނާލައިގެން އެކްޓު ކުރަނީ" އެރިކާ ބުންޏެވެ.
