ޔޫންގެ ބޭސްފަރުވާގެ ކަންކަން ދަނީ ހަމަޖައްސަމުން: އާސަންދަ
ހިތުގެ ބައްޔަށް ފަރުވާ ހޯދަމުންދާ އުމުރުން އަށް މަހުގެ ޔޫން މުޙައްމަދު ޔުނާން ގެ ބޭސް ފަރުވާގެ ކަންކަން ދަނީ ހަމަޖައްސަމުން ކަމުގައި އާސަންދަ ކުންފުނިން ބުނެފިއެވެ.
ފިލްމީ ތަރި ޔުނާން ގެ ހަގު ދަރިފުޅު ޔޫން އަވަސް ގޮތަކަށް ބޭސްފަރުވާއަށް އިންޑިއާއަށް ދިޔުމަށް އޭނާ ބެލި ޑޮކްޓަރުން ވެސް ބުނެފައިވާ ކަމަށް، ޔޫންގެ މައިންބަފައިން ބުނެއެވެ.
ނަމަވެސް ޔޫން އަށް އަދިވެސް ފުރޭގޮތް ނުވާ ކަމަށާއި، އާސަންދަ ލިބިފައި އިނީ ކިމްސް ހޮސްޕިޓަލުން ކަމަށާއި ދާން ބޭނުންވަނީ އަމްރިތާ އަށް ކަމަށް ވެސް ބުންޏެވެ. އަދި ފްލައިޓުން އަދިވެސް ޔޫން އަށް ޖާގައެއް ނުލިބޭ ކަމަށް އާސަންދައިން ބުނި ކަމަށް ވެސް ބުންޏެވެ.
މިކަންބޮޑުވުންތަކާއި ގުޅިގެން މިއަދު ޔުނާން އާއި އޭނަގެ އަންހެނުން ފާތިމަތު ރިހުލާ (ރިހޫ) ވަނީ ޔޫން ގޮވައިގެން މިއަދު ހަވީރު މުލިއާގޭ ކައިރިއަށް ގޮސް އަޑު އުފުލާފައެވެ.
މިކަމާއި ގުޅޭގޮތުން އާސަންދައިން ނެރުނު ބަޔާނެއްގައި ބުނެފައިވަނީ މިހާރުވެސް އާސަންދައިގެ ދަށުން 77 ބަލި މީހަކު އަމްރިތާ ހޮސްޕިޓަލަށް ގޮސްފައިވާއިރު އެތަނަށް ގޮސް ހުރުމުގެ އިންތިޒާމުތައް ހަމަޖައްސައި ދިނުމުގައި ދަތިތަކެއް އުޅޭކަމަށެވެ. އަދި އެ ހޮސްޕިޓަލަށް ދިޔަ ދިވެއްސަކު ކޮވިޑް19 އަށް ފައްސިވުމުން އެމީހާ އެކަހެރި ކުރުމުގެ އިންތިޒާމުތައް ހަމަޖައްސަމުން އަންނަ ކަމަށްވެސް އާސަންދައިން ވަނީ ބުނެފައެވެ.
މީގެއިތުރުން އިންޑިއާގެ ކިމްސް ހޮސްޕިޓަލަށް ޔުނާންގެ ދަރިފުޅު ބޭސްފަރުވާ އަށް ފޮނުވާލެވޭތޯ ވެސް މަސައްކަތް ކުރި ކަމަށާއި ނަމަވެސް އެ އޮޕަރޭޝަން ކިމްސް ހޮސްޕިޓަލުން ނުހެދޭނެ ކަމަށް އެ ހޮސްޕިޓަލުން ބުނެފައިވާ ކަމަށް އާސަންދައިން ބުނެއެވެ.
އާސަންދައިން ބުނީ މިހާރު ޗާޓަރ ކޮށްފައިވާ ފްލައިޓުވެސް ދަނީ ޓްރިވެންޑްރަމަށް ކަމަށާއި ޔޫން އެފްލައިޓުން ވެސް ގެންދެވޭނެ އިންތިޒާމު ހަމަޖައްސަމުން އަންނަ ކަމަށެވެ.
