ކޮންމެ މީހެއްގެ ފަހަތުގައި ފުލުހެއް ނުބެހެއްޓޭނެ، ފަރުދީ ޒިންމާ އަދާކުރޭ: ޝާހިދު
ކޮންމެ މީހެއްގެ ފަހަތުގައި ފުލުހެއް ނުބެހެއްޓޭނެ ކަމަށާއި އެހެންކަމުން ފަރުދީ ޒިންމާ އަދާކުރުމަށް ފޮރިން މިނިސްޓަރު އަބްދުﷲ ޝާހިދު އިލްތިމާސްކުރައްވައިފިއެވެ.
އައްޑޫ ސިޓީ އާއި ފުވައްމުލަކު ސިޓީގެ އިތުރުން ހއ. އިހަވަންދޫގައި ގާއިމްކުރި ކޮވިޑް-19 އަށް ފަރުވާދޭ މަރުކަޒުތައް އިފްތިތާޙްކުރުމަށް ބޭއްވި ރަސްމިއްޔާތު ޝަރަފުވެރި ކޮށްދެއްވައި ވާހަކަފުޅު ދައްކަވަމުން މިނިސްޓަރު ޝާހިދު ވިދާޅުވީ ބަލިޖެހޭ މީހުންގެ ޢަދަދު އިތުރުވުމަކީ ނުހަނު ކަންބޮޑުވާން ޖެހޭކަމެއް ކަމަށެވެ.
މީގެ ކުރިން ރާއްޖޭގައި ބަލިޖެހޭ މީހުންގެ ތެރޭގައި ބިދޭސީން ގިނަ ނަމަވެސް މިހާރަކަށް އައިސް ބަލިޖެހޭ ދިވެހިންގެ ޢަދަދު ދުވަހުން ދުވަހަށް އިތުރުވަމުން ދާކަމަށާއި، މިއީ މިބަލި ފެތުރުނަސް ވަރިހަމަކޮށްގެން ތިބޭވަރަށްވުރެ މާނުރައްކާތެރި ބައްޔެއްކަމުގައި މިނިސްޓަރ ޝާހިދު ވިދާޅުވިއެވެ.
އަދި މިއަދު ރާއްޖޭގެ އިގްތިސާދު ނަގާ ކޮޅަށް ޖަހަން ބަލާއިރު، އެކަމުގެ ފަރުދީ ޒިންމާ ދިވެހި ކޮންމެ ރައްޔިތެއްގެ ބޮލުގައި އެޅިފައިވާ ކަމަށާއި އެ ޒިންމާ ފުރިހަމަ އަށް އަދާނުކޮށް ދެން ރާއްޖޭގެ އިގްތިސާދު ނަގާ ކޮޅަށް ޖެހޭނެ ނުފެންނަ ކަމަށްވެސް ޝާހިދު ވިދާޅުވިއެވެ.
ރާއްޖެއަކީ ފަތުރުވެރިކަމަށް ވަރަށް ބޮޑަށް ބަރޯސާވެފައިވާ ގައުމެއްކަން ފާހަގަކުރައްވަމުން ޝާހިދު ވަނީ ދުނިޔޭގެ ގައުމުތަކުން ދަތުރުފަތުރު ހުޅުވާއިރު ބަލަމުންދަނީ އެގައުމެއްގައި ކޮވިޑަށް ފެތުރެމުންދާ ނިސްބަތަށް ކަމަށާއި އެގޮތުން ރާއްޖޭގައި މި ބަލި ޖެހޭ މީހުން އިތުރުވާނަމަ އެހެން ގައުމުތަކުން ރާއްޖެ އަށް ފަތުރުވެރިން ފޮނުވުމުގައި ހުރަސްތަކެއް ކުރިމަތިވާނެ ކަމަށް ވިދާޅުވެފައެވެ.
"ރާއްޖޭގެ އިގްތިސާދު ކޮޅަށް ނެގޭނީ އެންމެން އަތުގުޅާލައިގެން، ސިއްހީ ދާއިރާގައި މަސައްކަތް ކުރައްވާ ފަންނާނުން އެ ދެއްވާ ފިލާވަޅުތަކަށް، އެ ދެއްވާ އިރުޝާދުތަކަށް ފުރިހަމަ އަށް ބޯލަނބައިގެން. ކޮންމެ ފަރުދެއްގެ ފަހަތުގައި ފުލުހަކު ބަހައްޓައިގެން ކުރެވޭނެ ކަމެއް ނޫން މިއީ. މިކަން ކުރެވޭނީ އަމިއްލަ ފަރުދުންގެ ގައުމީ ވާޖިބު، ގައުމީ ޒިންމާ ފުރިހަމަ އަށް އަދާކޮށްގެން" ޝާހިދު ވިދާޅުވިއެވެ.
ރާއްޖޭގެ ހަތް ސަރަހައްދެއްގައި ކޮވިޑް-19އަށް ފަރުވާދޭ މަރުކަޒުތަށް ގާއިމްކޮށް މިހާރު ޚިދުމަތްފެށިފައި ވާއިރު، ރާއްޖޭގައި ހުރި ވަސީލަތްތަކާއި ލިބުނު އެހީގެ ބޭނުންހިފައިގެން ތައްޔާރުވެވޭ އެންމެބޮޑަށް ތައްޔާރުވެވިފައި ވާކަމުގައިވެސް މިނިސްޓަރު ޝާހިދު ވިދާޅުވިއެވެ. އަދި ޞިއްޙީ ޚިދުމަތްތެރިންގެ މެދުގައި ބަލިފެތުރޭނަމަ ވަރަށް ބޮޑުނުރައްކަލަކާއި ކުރިމަތިލާން ޖެހިދާނެކަމުގައިވެސް މިނިސްޓަރު ޝާހުދު ވިދާޅުވިއެވެ.
