''އަހަރެން ފަދަ އިތުރު ދަރިއެއް މި މުޖުތަމައުއަށް އުފަންވާކަށް އަހަރެން ނޭދެމެވެ."ތެލެސީމިއާ ކުއްޖެއް
މިއީ އަހަރެންގެ ހަޔާތުގެ ވާހަކައެވެ. އަހަރެން ފަދަ ކޮންމެ ތެލެސީމިއާ މޭޖާއެއްގެ ހިތުގެ އުދާހެވެ. ކޮންމެ ދުވަހެއްގެ އެތައް ވަގުތެއްގައި ޑެސްފަރޯލް އިންޖެކްޝަން ޖަހައިގެން ހޭދަކުރަމެވެ. ބައެއް ހަފްތާތަކަކީ ދެފަހަރު ލޭ އަޅަންޖެހޭ ހަފްތާތަކެވެ.
އަހަރެންގެ މައިންބަފައިން ލޯބީގެ ގޮތުން ގުޅި ޒަވާޖީ ހަޔާތެއްފެށި އިރު އެދެމީހުންނަކީ ތެލެސީމިއާ ކެރިއަރުންކަމެއް އެމީހުންނަކަށް ނޭނގެއެވެ. ނަމަވެސް މިއަދު މިކަން މިވަނީ ބަދަލު ވެފައެވެ. ކައިވެނި ކުރުމުގެ ކުރިން ތެލެސީމިއާ ކެރިއަރުންތޯ ބަލާލުމަކީ ދާދި ފަސޭހަ ކަމެކެވެ.
ލޯބީގެ މަސްތުގައިޖެހި ދުރުވާންބޭނުން ނެތިފައި ތިބި ކެރިއަރުން މި މުޖުތަމައުގައި ބައިވަރު އެބަތިއްބެވެ.މި އެންމެނަށް ބުނަމެވެ. އަހަރެންނާއި އަހަރެންގެ މައިންބަފައިން މި އުފުލަމުންދާ ވޭން ތިބާޔަށް އިހުސާސް ކުރެވޭނަމަ ތި ގުޅުން އިތުރަށް ކުރިޔަށް ނުގެންދާނޭކަން ހަމަޔަގީނެވެ. އަހަރެންގެ މައިންބަފައިން އުފުލަމުން މިދާ ވޭން އެންމެ ކައިރިން ފެންނާނެ އެކަކަކީ އަހަންނެވެ. ހަމަގައިމުވެސް އަހަރެން ފަދަ އިތުރު ދަރިއެއް މިދުނިޔެއަށް އުފަންވެ، އަހަރެން މިއުފުލާ ވޭން ތަޙައްމަލް ކުރުން އެއީ އަހަރެން ބޭނުންވާ ގޮތެއްނޫނެވެ.
ތެލެސީމިއާ މޭޖާއެއްގެ ގޮތުގައި ހުރެ ވަރަށް ގިނަ ކަންކަމާ އަހަރެން ކުރިމަތި ލައިފީމެވެ. ގިނަ ކަންތައް ތަކެއްގައި މުޖުތަމައުއިން އަހަރެން ބާކީ ކޮށްލައިފިއެވެ. ނަމަވެސް އަހަރެންގެ އެއްވެސް ޝަކުވާ އެއްނެތެވެ. ތިބާގެ ކޮއްކޮ ނުވަތަ ދަރިއެއް މިކަހަލަ ބައްޔެއްގެ ޝިކާރައަކަށްވެ މުޖްތަމައުއިން ބާކީ ކޮށްލައިފިނަމަ އަހަރެންނާއި އަހަރެންގެ މައިންބަފައިންގެ ހިތުގެ އުދާސްތައް ތިބާޔަށް ވެސް އެނގޭނެކަން ޔަގީނެވެ.
ލޯބިވާ މައިންބަފައިންނޭވެ. ލޯބިވާ ދެ މީހަކު ކައިވެނި ކުރުމަކީ މައްސަލައެއް ނޫނެވެ. ނަމަވެސް ތެލަސީމިއާ ދެ ކެރިއަރުންކަން އެނގިތިބެ ކައިވެނިކުރުމަކީ ހެދޭ ގޯހެކެވެ. ލޯބީގެ ވަގުތީ އުފަލަކަށްޓަކާ ކައިވެނިކޮށް، ކުއްޖެއް ހޯދާނަމަ އެ ކުއްޖާއަށް އެ ދެވެނީ ތަހައްމަލު ނުކުރެވޭ ވަރުގެ ވޭނެކެވެ. މަގުފަހި އެ ކުރެވެނީ ބަލިކަށި މުޖުތަމައު އަކަށެވެ.
ސޮސައިޓީ ފޯ ހެލްތު އެޑިޔުކޭޝަން (ޝީ)ގެ މައުލޫމާތުތައް ދައްކާ ގޮތުން ރާއްޖޭގައި ކުރެވޭ ކޮންމެ 30 ކައިވެންޏަކުން އެއް ކައިވެންޏަކީ ދެ ކެރިއަރުންގެ ދެމެދު ކުރެވޭ ކައިވެންޏެކެވެ. އަދި އުފަންވާ ކޮންމެ 120 ކުއްޖަކުން އެއް ކުއްޖަކީ ތެލެސީމިއާ ބަލި ހުންނަ ކުއްޖަކަށްވެ އެވެ. އެއީ ގާތްގަނޑަކަށް އެވްރެޖްކޮށް އަހަރަކު 26 ކުދިންނެވެ. ތަފާސް ހިސާބުތައް ދައްކާ ގޮތުން ތެލެސީމިއާ ބަލީގައި ރާއްޖޭގައި އެވްރެޖްކޮށް އަހަރަކު ހަ ކުދިން މަރުވެއެވެ.
ތެލެސީމިއާ ދެ ކެރިއަރުންކަން އެނގިތިބެ، ކައިވެންޏަށް ހުށަހެޅިގަތުމަކީ ގޯހެކެވެ. ލޯބީގެ ގުޅުން ދަމަހައްޓަން ދަރިފަސްކޮޅު ހަލާކުގެ ތެރެއަށް އެއްލައިލައިގެން ނުވާނެ އެވެ. ލޯބީގެ ގުޅުމަކުން، ދެމިގެންދާ ވޭނެއްގެ ތެރެއަށް ޖީލުގެ ދަރިންތަކެއް ދޫކޮށްލުމަކީ އެ ކުދިންނަށް ދެވޭ އަނިޔާއެކެވެ.
Ads by STO
