ހާލަތާއި އެކަށީގެންވާ ގޮތްތައް ބޭނުން ކޮށްގެން ޙިޔާލުފާޅު ކުރަން ފުލުހުން އިލްތިމާސް ކޮށްފި
ރާއްޖޭގައި ވެސް ކޮވިޑް-19 ފެތުރި ފައްސިވާ މީހުން ވެސް އިތުރުވަމުން ދާތީ، ހާލަތާއި އެކަށީގެންވާ ގޮތްތައް ބޭނުންކޮށްގެން ހިޔާލުފާޅުކުރަން ފުލުހުން އިލްތިމާސްކޮށްފިއެވެ.
ފުލުހުން މިހެން ވިދާޅުވެފައިވަނީ އިދިކޮޅު ޕީޕީއެމް/ޕީއެންސީ އިން މިރޭ ވެސް ސަރުކާރާއި ދެކޮޅަށް އަޑުއުފުލުމަށް ތައްޔާރުވަމުންދާ ދަނޑިވަޅެއްގައެވެ.
ފުލުހުން މިރޭ ނެރުނު ބަޔާނެެއްގަައި ބުނެފައިވަނީ އެޗްޕީއޭގެ އެންގުންތަކާ ހިލާފަށް މަގުމައްޗަށް އެއްވެ، އިޖުތިމާއީ ގައިދުރުކަމަށް ވެސް ބެލުމެއް ނެތި، ބައެއް މީހުން މާސްކު ވެސް ނާޅާ އެއްވުންތައް ކުރިއަށްގެންދާކަން ފާހަގަކުރެވިފައިވާ ކަމަށާއި މިވަގުތަކީ ކޮވިޑަށް ރާއްޖެއިން ފައްސިވާ މީހުން އިތުރުވަމުންދާ ދުވަސްވަރަކަށްވާތީ އާއި ފުލުހުންގެ ތެރެއިން ކުރީ ސަފުގައި މަސައްކަތް ކުރާ ފުލުހުން ވެސް ފައްސިވާ އަދަދު އިތުރުވަމުންދާ ދުވަސްވަރަކަށްވާތީ، މަގުމައްޗަށް ނިކުމެ އުޅޭއިރު ސިއްހީ ގޮތުން ރައްކާތެރިވުމަށް ދީފައިވާ އިރުޝާދުތަކަށް ސަމާލުވުމަށެވެ.
"ގާނޫނީ ތަރަހައިގެ ތެރެއިން، މި ހާލަތާ އެކަށީގެންވާ ގޮތްތައް ބޭނުންކޮށްގެން ހިޔާލުފާޅުކުރުމަށް އިލްތިމާސްކުރަން" އެ ބަޔާނުގައި ބުނެފައިވެއެވެ.
