ދިއްފުށީގައި އާންމު ހާލަތުގައި ތިބި މީހުންނަށް ވުރެ ގިނައީ ކަރަންޓީނުގައި ތިބި މީހުން: އީސީ
ކ. ދިއްފުށީގައި އާންމު ހާލަތުގައި ތިބި މީހުންނަށް ވުރެ ގިނައީ ކަރަންޓީނުގައި ތިބި މީހުން ކަމަށް އިލެކްޝަން ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެއެވެ.
އެގޮތުން ދިއްފުށީގައި ވޯޓު ލުމުގެ ހައްގު ލިބިގެންވާ 710 މީހަކު ތިބި ކަމަށާއި އޭގެ ތެރެއިން އާންމު ހާލަތުގައި ތިބީ 200 މީހުން ކަމަށާއި ބާކީ ތިބި 510 މީހުންނަކީ ކަރަންޓީނުގައި ތިބި ނުވަތަ ފައްސިވެފައިވާ މީހުން ކަމަށް އިލެކްޝަނުން މިއަދު އެޑްވައިސަރީ ކޮމިޓީއާއެކު ބޭއްވި ބައްދަލުވުމުގައި ވާހަކަ ދައްކަވަމުން ޝަރީފް ވިދާޅުވިއެވެ.
200 މީހުން ވޯޓު ލުމަށް ހެނދުނު ހަތަކުން ފެށިގެން ފަހަކަށް ހަމަޖައްސައި އަދި 500 މީހުންނަށް ފަހަކުން ހަޔަކަށް ވޯޓު ލާން ފުރުސަތު ދިނުމީ އެކަމުގައި "އިމްބެލެންސް" ތަކެއް ހުރިކަމެއް ކަމަށް ފާހަގަ ކުރައްވާ ޝަރީފް ވިދާޅުވީ، އީސީގެ އެޑްވައިސަރީ ކޮމިޓީއާއެކު، މިކަމާ ގުޅިގެން ކަރަންޓީނު ނުވަތަ ފައްސި މީހުން ވޯޓުލާ ގަޑި ދިއްފުށީގައި އިތުރު ކުރުމާ ބެހޭ ގޮތުން މަޝްވަރާ ކުރައްވާ، ގޮތެއް ނިންމަވާނެ ކަމަށެވެ.
އަދި މިހާރު ވޯޓުލުން ކުރިއަށް ދާނީ ކުރިން އިއުލާނު ކުރި ގަޑިއާ އެއްގޮތަށް ކަމަށް ޝަރީފް ވިދާޅުވިއެވެ.
އެހެން ނަމަވެސް އެޗްޕީއޭއިން ދިން ދޫތަކާއެކު، މިހާރު އެ އެއްގަޑިއިރުގައި ގިނަ ބަޔަކު ވޯޓުލާން އަންނާނެ ކަމަށް ބެލެވޭ ކަމަށާއި، ކަރަންޓީނު އަދި ފައްސިވެފައިވާ މީހުނަށް ވޯޓުލުމުގެ ކަންކަން ހަމަޖައްސާފައި ވަނީ އެޗްޕީއޭ ގައިޑްލައިންގައިވާ ގޮތުގެ މަތިން ކަމަށް ޝަރީފް ވިދާޅުވިއެވެ.
ހަމައެއާއެކު ފެލިވަރު ކަހަލަ ވޯޓުފޮށި ބަހައްޓާފައި ނުވާ ރަށްރަށުން ކަރަންޓީނު އަދި ބައްޔަށް ފައްސި މީހުންނަށް ވެސް ކައިރި ރަށްރަށަށް ވޯޓު ލުމަށް ދަތުރު ކުރުމަށް އެޗްޕީއޭއިން ހުއްދަ ދީފައިވާކަން ޝަރީފް ވަނީ ފާހަގަ ކުރައްވާފައެވެ.
