ސަމާލުވޭ! އެހެން މީހުންނަށް ކޮވިޑް ފެތުރުމަށް މާލޭގައި ބަޔަކު މަސައްކަތް ކުރާކަމުގެ އަޑުތަކެއް!

ނުރައްކާތެރި ކޮވިޑް-19 ރާއްޖޭގައި ވެސް ފެތުރެމުން އަންނައިރު، ބަޔަކު މީހުން މިބަލި އެހެން މީހުންނަށް ޖެއްސުމަށް މަސައްކަތް ކުރަމުންދާ ކަމުގެ އަޑުތަކެއް ފެތުރެމުން އެބަދެއެވެ.

Ads by MWSC

އެގޮތުން މީސްމީޑިއާގައި މިއަދު އާއްމުވެފައިވާ ސީސީޓީވީ ފުޓޭޖަކުން ފެންނަނީ މާސްކެއް އަޅައިގެން ހުރި މެދު އުމުރުފުރައިގެ ފިރިހެނަކު، ގެއެއްގެ ދޮރު ކައިރިއަށް ގޮސް މާސްކު ނެގުމަށްފަހު ނޭފަތާއި، އަނގައާއި މޫނުގައި އަތް ހޭކުމަށްފަހު އެގޭ ދޮރުގައި އަތްލާ ތަނެވެ.

އެމީހާއަކީ ކާކުކަމެއް އަދި އެއީ ކޮވިޑަށް ފައްސި ވެފައިވާ މީހެއް ކަމެއް ނުވަތަ ނޫން ކަމެއް ވެސް އަދިއެއް ނޭނގެއެވެ. ނަމަވެސް ވީޑިއޯ އާއްމުކުރި ފަރާތުން ލިޔެފައިވަނީ "ބަލީގެ އަލާމަަތްތައް ހުންނަ މާލޭގައި ދިރިއުޅޭ ބައެއް ފަރާތްތަކުން ބަލި އިތުރަށް ފެތުރުމަށްޓަކައި މީހުން އެއްވެ އުޅޭ ތަންތަނަށާއި މީހުން ނިދާފަ ތިބޭ ވަގުތު ތަކުގައި ގޭގޭގެ ދޮރުތަކުގައާއި ފިހާރަތަކުގެ ދޮރުތަކުގެ އަތްގަނޑުގައި ކުޅު ހާކަމުން އެބަގެންދޭ" ކަމަށާއި ޗައިނާ ގޮތަށް ސީސީޓީވީ ފުޓެޖް ވަރަށް އަވަހަށް މީޑިއާތަކަށް ނެރޭނެ ކަމަށް ވެސް ބުނެފައިވެއެވެ.

މިކަމާއި ގުޅިގެން ފުލުހުން ވިދާޅުވެފައިވަނީ އެވީޑިއޯ ފުލުހުންގެ ސަމާލުކަމަށް އައިސްފައިވާ ކަމަށާއި ވީޑިއޯގައި ތުހުމަތު ކުރެވޭ ގޮތަކަށް މީހެއްގެ ޢަމަލުތަށް ހުރުމުން ބަލަންޖެހޭ ކަންކަން ފުލުހުން ބަލަމުންދާ ކަމަށެވެ.

މިވީޑިއޯ އާއި ގުޅޭ އިތުރު މައުލޫމާތެއް ލިބިފައިވާ ފަރާތެއްވާނަމަ ފުލުހުންގެ ޖެނެރަލް އިންވެސްޓިގޭޝަން ޑިޕާޓްމަންޓުގެ ނަންބަރ 9631696 އަށް ގުޅާލާ މައުލޫމާތު ހިއްސަަ ކުރުމަށް ވެސް ފުލުހުން އެދިފައިވެއެވެ.