ކޮވިޑް ޖެހިގެން އަމީތާބު މަރުވެއްޖިއްޔާ ރަނގަޅޭ ބުނި މީހަކަށް ދިން ރައްދު!
ކޮވިޑް-19 ޖެހިގެން އިންޑިއާގެ ނާނާވަތީ ހޮސްޕިޓަލުގައި ފަރުވާ ހޯދަމުންދާ ބޮލީވުޑްގެ މެގާސްޓާ އަމީތާބް ބަޗަން، އެބަލީގައި މަރުވެއްޖިއްޔާ ރަނގަޅޭ މީހަކު ބުނެފިއެވެ.
އެއީ ކާކުކަމެއް އެނގިފައިނުވާއިރު، އަމީތާބު ވަނީ އެމީހާއަށް ރައްދެއް ވެސް ދީފައެވެ.
އުމުރުން 77 އަހަރުގެ އަމީތާބު ވަނީ އޭނާގެ އަމިއްލަ ބްލޮގްގައި އެމީހާއަށް ރައްދުދީ މެސެޖެއް ލިޔެފައެވެ.
އެގޮތުން އަމީތާބު ބުނީ އެމީހާ އެފަދަ އެއްޗެއް ބުނެފައި އެވަނީ ސަމާލުކަމާއި މުހިންމުކަން ހޯދުމުގެ ނިޔަތުގައި ކަމަށެވެ.
"ދެކަމުން ކުރެ އެއްކަމެއް ވާނީ. އަހަރެން މަރުވުން ނޫނީ ސަލާމަތްވުން. އަހަރެން މަރުވެއްޖިއްޔާ ދެން ތިކަހަލަ އެއްޗެއް ތިމީހާ ލިޔާނީ ކިހިނެއް؟ ތިލިޔުނު އެއްޗަކަށް އެހާ ސަމާލުކަމެއް އެލިބުނީ ވެސް އަމީތާބް ބަޗަން އާއި ދިމާކުރީތީ. އެކަމަކު އަހަރެން މަރުނުވެ ސަލާމަތް ވެއްޖިއްޔާ އަހަރެންގެ 90 މިލިއަނަށްވުރެ ގިނަ ފޮލޯވަރުން ތިމީހާއާއި އެދުވަހަކުން ވަރަށް ދިމާކުރާނެ" އަމީތާބު ލިޔެފައިވެއެވެ.
އަމީތާބު މަރުވާން އެދުނު މީހާއާއި ދިމާކުރަން ފޭނުން ކައިރީ އަދި ނުބުނި ނަމަވެސް، ކޮވިޑުން ސަލާމަތް ވެއްޖިއްޔާ ބުނާނަން ކަމަށް ވެސް އަމީތާބު ބުންޏެވެ. އަދި އޭނާގެ ފޭނުން ދުނިޔޭގެ އެކި ކަންކޮޅުތަކުގައި އިންތިހާއަށް ގިނަކަން ވެސް އަމީތާބު ވަނީ ފާހަގަ ކޮށްފައެވެ.
Ads by STO
