އެމްޑީޕީގެ ޓިކެޓުގައި ރައީސް ކަމަށް ކުރިމަތި ލައްވަން އަލްހާން ޝައުގުވެރިކަން ފާޅުކުރައްވައިފި

2023 ވަނަ އަހަރުގެ ރިޔާސީ އިންތިހާބުގައި އެމްޑީޕީ ޓިކެޓުގައި ވާދަކުރުމުގެ ޝައުގުވެރިކަން ހުރިކަން، ލޯކަލް ކައުންސިލްތަކުގެ އިންތިހާބުގައި މާލޭ މޭޔަރު ކަމަށް އަމިއްލަ ގޮތުން ވާދަ ކުރެއްވި ކެންޑިޑޭޓް އަލްހާން ފަހުމީ ފާޅު ކުރައްވައިފިއެވެ.

Ads by STELCO

އެމްޑީޕީގެ ރައީސްކަން ވެސް ކުރައްވާފައިވާ އަލްހާން ފަހުމީ މިއަދު ކުރެއްވި ޓްވީޓެއްގައި ވިދާޅުވީ އެމްޑީޕީ ޓިކެޓުގައި އަލްހާން ރައީސް ކަމަށް ކުރިމަތި ނުލާންވީ ސަބަބެއް ނެތް ކަމަށެވެ. އަދި ޑިމޮކްރަޓިކް އުސޫލުތައް އަލުން ގާއިމް ކޮށްގެން، އެމްޑީޕީއަށް އަދިވެސް ކާމިޔާބު ހޯދޭނެ ކަމަށާއި އެދެނީ އެމްޑީޕީއާއެކު މިކަމުގައި ކުރިއަށް ދާން ކަމުގައި އަލްހާން ވިދާޅުވިއެވެ.

ކައުންސިލް އިންތިހާބުގައި އަލްހާންއަށް ލިބިވަޑައިގަތީ މުޅި މާލޭގެ އެކެއް އިންސައްތައެވެ. ވަގުތީ ނަތީޖާތަކުން ދައްކާ ގޮތުގައި އަލްހާނަށް ލިބިވަޑައިގަތީ އެންމެ 259 ވޯޓެވެ. މާލޭގެ މޭޔަރު ކަމުގެ އިންތިޚާބުގައި މުޢިއްޒުއަށް ލިބިފައި ވަނީ 61.47 އިންސައްތަ ވޯޓެވެ. އެއީ 9،305 ވޯޓެވެ. އަދި އެމްޑީޕީގެ ކެނޑިޑޭޓް އަނަސް އަބްދުއްސައްތާރަށް ލިބުނީ 36.82 އިންސައްތަ ވޯޓެވެ. އެއީ 5،573 ވޯޓެވެ.

އަލްހާން ފަހުމީ އަކީ ފޭދޫ ދާއިރާގެ ކުރީގެ މެންބަރެވެ. މޭޔަރު ކަމަށް އޭނާ އަމިއްލަ ގޮތުން ވާދަ ކުރެއްވީ މާލޭގައި ހުރި މައްސަލަތައް ހައްލު ކުރެވޭނެ ޕާޓީއެއް ވެސް، ކެނޑިޑޭޓެއް ވެސް ނެތުމުން ކަމަށް އޭނާ ވަނީ ވިދާޅުވެފައެވެ.