ކޮވިޑަށް ޓެސްޓު ކުރުން މަދުވަނީ އެތައް ސަބަބަކާ ހުރެ: ޑރ.ނަޒްލާ
ފަހަކަށް އައިސް ކޮވިޑް-19 އަށް ޓެސްޓުކުރާ މިންވަރު މަދުވަނީ އެންމެ ސަބަބަކާ ހުރެ ނޫން ކަމަށާއި، އެކަމުގައި އެތައް ސަބަބުތަކެއް އެބަހުރި ކަމަށް ހެލްތު އެމެޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގް ވިދާޅުވެއްޖެއެވެ.
އެޗްއީއޯސީން މިއަދު ބޭއްްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޑރ. ނަޒްލާ ވިދާޅުވީ، މީގެ ދުވަސްކޮޅެއް ކުރިން އަތޮޅު ތެރެެއިން ގިނަ އަދަދެއްގެ ކޮވިޑް ފައްސި ކޭސްތަކެއް ފެނި ވަރަށް ގިނަ އަދަދެއްގެ ސާމްޕަލްތަކެއް ނެގުމަށް ފަހު އެރަށްތައް ހަމައަކަށް އެޅުމުން ސާމްޕަލްތައް ނަގަން ފެށި އަދަދު ދަށްވެގެން ދިޔަކަމީ އޭގެ އެއް ސަބަބު ކަމަށެވެ.
މީގެ އިތުރުން ކޮވިޑަށް ޓެސްޓްކުރަން އައިޖީއެމްއެޗްގައި ބޭނުން ކުރަމުން ދިޔަ އެކްސްޓްރެކްޝަން ކިޓްސް މަދުވެ، މެނުއަލް އެކްސްޓްރެކްޝަން ހަދަން ޖެހުމުގެ ސަބަބުން އައިޖީއެމްއެޗުން ސާމްޕަލް ޓެސްޓްކުރެވޭ ވަރު މަދުވެގެން ދިޔަ ކަމުގައި ވެސް ނަޒްލާ ފާހަގަ ކުރެއްވިއެވެ. އެހެން ނަމަވެސް އައިޖީއެމްއެޗުން މިހާރު ވަނީ ކިޓްތައް އަލުން ހޯދައިފައެވެ.
ހިނގަމުން މިދާ ރަމަޟާން މަހު ކޮވިޑަށް ޓެސްޓު ކުރުމަށް ސާމްޕަލް ނެގުން މަދުވުމުގެ ސަބަބުން ޑރ ނަޒްލާ ހާމަ ކޮށްފައި ނުވި ނަމަވެސް ވަރަށް އަވަހަށް އަނެއްކާ ވެސް ސާމްޕަލްތައް މާލެ ތެެރެއިން ނެގެން ފަށާނެ ކަމުގައި ޑރ ނަޒްލާ ފާހަގަ ކުރެއްވިއެވެ. މި ފަހަކަށް އައިސް ކޮވިޑް-19 އަށް ރާއްޖެއިން ފައްސިވާ މީހުންގެ އަދަދު ދަށްވެފައިވާ އިރު، މިފިޔަ ހަފްތާގައި ރާއްޖެއިން ކޮވިޑަށް ފައްސިވި މީހުންގެ އަދަދު އެވަރެޖުކޮށް އުޅެނީ 100 އިން ދަށުގައެވެ.
