މައްސަރުގެ ދުވަސްވަރު ވެކްސިން ނުޖޭހެ ކަމަށް ބުނެ ދައުރުވާ މެސެޖްގެ ހަޤީޤަތް
ކޮވިޑް-19ގެ ވެކްސިން 18 އަހަރުން މަތީގެ ކޮންމެ މީހަކަަށް ވެސް ޖެހޭނެ ކަމަށް ސަރުކާރުގެ އުސޫލުތަކުގައި ވެސް ބުނެފައިވެއެވެ. އަދި އެހެން ގައުމުތަކުގައި ވެސް ކަންތައް ކުރާ އުސޫލަކީ އެއީއެވެ.
ދާދި ފަހަކުން މީސްމީޑިއާގައި ވަނީ މެސެޖެއް ދައުރުވެފައެވެ. އެ މެސެޖުގައި ބުނެފައި ވަނީ އަންހެނުން މައްސަރު ކަންތައް ދިމާވުމުގެ 5 ދުވަސް ކުރިން އަދި މައްސަރު ކަންތައް ނިމުމަަށް ފަހު 5 ދުވަސް ތެރޭގައި ވެސް ކޮވިޑް ވެކްސިން ޖެހުން ރައްކާތެރި ނޫން ކަމަަށެވެ.
އެ މެސެޖުގައި ބުނެފައިވާ ގޮތުގައި އެ ދުވަސްވަރު އަންހެނުންގެ ދިފާއީ ނިޒާމް ބަލިކަށިވާނެއެވެ. އަދި އެހެންކަމުން އެ ދުވަސްތަކުގައި ވެކްސިން ޖެހުން ރައްކާތެރިއެއް ނުވާނެއެވެ.
މިކަމާ ގުޅިގެން އިންޑިއާގެ ބައެއް ޑޮކްޓަރުން ވަނީ ވާހަކަ ދައްކާފައެވެ. އެ ޑޮކްޓަރުންް ބުނެފައިވާ ގޮތުގައި އަންހެނުން އެ ދުވަސްވަރު ބަލިކަށިވާކަން އެއްވެސް ގޮތަކުން ސާބިތުވެފައެއް ނުވެއެވެ. ސައިންސުން ވެސް އެކަމަަށް ބާރުދޭ އެއްވެސް ކަމެއް ވެސް ނެތެވެ.
ވެކްސިން ޖެހުމުގައި ހަރަކާތްތެރިވާ އިންޑިއާގެ ޑޮކްޓަރެއް ކަމަށްވާ ޑރ.ޝިމްނާ އަޒީޒް ވިދާޅުވާ ގޮތުގައި އެތައް އަންހެނުންނެއް މައްސަރު ކަންތައް ކުރިމަތިވެފައި ވަނިކޮށް ވެސް ވެކްސިން ޖަހާފައިވެއެވެ. އަދި އެ މީހުންގެ ފަރާތުން އެއްވެސް ކަހަލަ މައްސަލައެއް ހުށަހެޅިފައި ނުވާ ކަމުގައި އޭނާ ބުނެއެވެ.
އެހެންކަމުން، ސިއްހީ މާހިރުން ވަނީ އެފަދަ މެސެޖުތަކަށް ސަމާލުވުމަށް އިލްތިމާސް ކޮށްފައެވެ. އަދި މައްސަރު ކަންތައް ދިމާވެފައިވާ ދުވަސްވަރުގައި ވެކްސިން ޖެހުމުގައި ވެސް އެއްވެސް ގެއްލުމެއް ނުވާ ކަމަށް ސިއްހީ މާހިރުން ވިދާޅުވެއެވެ.
