ރައީސް ޔާމީން ގޭބަންދަށް ބަދަލުކުރުމަށް ގޮތެއް ނުނިންމާ: ކަރެކްޝަންސް
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ގޭބަންދަށް ބަދަލުކުރުމަށް އަދި ވަކިގޮތެއް ނިންމަވާފައި ނުވާކަމަށް މޯލްޑިވްސް ކަރެކްޝަނަލް ސާރވިސްއިން ވިދާޅުވެއްޖެއެވެ.
ކަރެކްޝަނަލް ސާރވިސްއިން ވިދާޅުވީ، ރައީސް ޔާމީން ގޭބަންދަށް ބަދަލުކުރުމަށް މަޝްވަރާ ކުރެވެމުންދާ ކަމަށާއި، ނަމަވެސް އަދި ވަކި ގޮތެއް ނިންމާފައި ނުވާކަމަށެވެ.
ރައީސް ޔާމީން ގޭބަންދަށް ބަދަލުކޮށްދެއްވުމަށް އެދި އެމަނިކުފާނުގެ އަނބިކަނބަލުން ފާޠިމަތު އިބްރާހީމް ވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ސިޓީއެއް ފޮނުއްވާފައެވެ.
ރައީސް ޔާމީން ގޭ ބަންދަށް ބަދަލު ކުރަން މަޝްވަރާ ކުރަމުން ދަނީ، އިދިކޮޅު ފަރާތްތަކަށް ސަރުކާރަށް ޕްރެޝަރު ކުރަމުންދާ ދަނޑިވަޅެއްގައެވެ. ސަރުކާރަށް ލޯކަލް ކައުންސިލް އިންތިޚާބު ކާމިޔާބު ނުވުމާއެކު، އިދިކޮޅު ފަރާތްތަކުން ރައީސް ޔާމީން ދޫކޮށްލަން ކުރަމުންދާ ޕްރެޝަރުތައް ވަނީ އިތުރުކޮށްފައެވެ.
މަނީ ލޯންޑަރިންގގެ ކުށް ސާބިތުވާ ކަމަށް ކަނޑައަޅުއްވައި ޖަލު ހުކުމެއް ފުރުއްވަމުން ގެންދަވާ ރައީސް ޔާމީން ޖަލުގައި ހޭދަ ކުރައްވާތާ މިހާރު ވަނީ 509 ދުވަސް ވެފައެވެ. ރައީސް ޔާމީންގެ ޝަރީއަތް ހިނގައިދިޔަ ގޮތުން އެ މަނިކުފާނުގެ ވަކީލުންނާއި އިދިކޮޅުން ވަނީ ގިނަ ކަންބޮޑުވުންތަކެއް ފާޅު ކޮށްފައެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވިދާޅުވެފައިވަނީ، ރައީސް ޔާމީން ގެއަށް ބަދަލު ކުރުމުގައި ގޮތްތަކެއް ނިންމުމަށް، ބަލަން ޖެހޭ ކަންކަން މިހާރު ބައްލަވަމުން ގެންދަވާ ކަަމަށެވެ.
ތީދެން ކިގާ ދެރަކަމެއް. ގައިމުވެސް ނޫސްތަކުން ވަކި ޚަބަރެއް ލިޔާނީ ކޮންމެވެސް އަސްލަކަށް ބަލައިގެންނޫންތޯ؟