ފައްސިވެ ހުރެ މަގުތަކަށް ނުކުމެ އުޅުނު ދެ މީހަކު 10،000 ރުފިޔާއިން ޖޫރިމަނާ ކޮށްފި
ކޮވިޑް-19 ގެ ހާލަތު އެންމެ ނުރައްކާވެފައި އޮތް އއ. މަތިވެރީގައި ބަލި ޖެހުނު ދެ މީހަކު ކަރަންޓީންވާން އަންގާފައި ވަނިކޮށް އެޗްޕީއާގެ އުސޫލާ ހިލާފުވެ މަގުތަކަށް ނުކުމެ އުޅެނިކޮށް 10،000 ރުފިޔާއިން ޖޫރިމަނާ ކޮށްފިއެވެ.
މިއީ ކޮވިޑް-19 ގެ ހާލަތާއި ގުޅިގެން ޖޫރިމަނާ ކުރަން ކަނޑައަޅާފައިވާ އަދަދުގެ އެންމެ ބޮޑު އަދަދެވެ.
އެނގިފައިވާ ގޮތުގައި މަތިވެރީގައި ތިބޭ ފުލުހުން މި ދެ މީހުން ޖޫރިމަނާ ކުރީ މަގުމަތީގައި އުޅެނިކޮށް ފެނިގެންނެވެ. މީގެ ތެރެއިން އެކަކު ބޭރަށް ނުކުމެ އުޅުނީ އޭނާ ހުރި ގެއިން އެހެން ގެއަކަށް ދިއުމަށް ކަމަށާއި އަނެކަކު ބޭރަށް ނުކުމެ އުޅުނީ މީހަކާ ބައްދަލުކުރަން ކަމަށް ވެސް މައުލޫމާތު ލިބެއެވެ.
"ދެން" އަށް އެނގިފައިވާ ގޮތުގައި މަތިވެރިން 10،000 ރުފިޔާއަށް ޖޫރިމަނާ ކުރި ދެ މީހުންގެ ތެރެއިން އެކަކީ އެރަށު ސްކޫލުުގެ ޓީޗަރެކެވެ. ޖޫރިމަނާ ކުރުމާ ގުޅިގެން ނުރުހުން ފާޅުކޮށް އެ ޓީޗަރު ވަނީ މީސް މީޑިއާގައި ސިޓީ އެއް ވެސް އާންމުކޮށްފައެވެ. އެ ޓީޗަރު ބުނީ އޭނާގެ އަސާސީ މުސާރައަށް 8440 ރުފިޔާ ލިބޭއިރު، 10،000 ރުފިޔާއިން ޖޫރިމަނާ ކުރުން އިންސާފުވެރި ނޫން ކަމަށެވެ. ޖޫރިމަނާ ކުރި ފަހުން ވެސް އެ ޓީޗަރު ރަށު ތެރެއަށް ނުކުމެ އުޅޭ ކަމަށް ވެސް މައުލޫމާތު ލިބެއެވެ.
މީގެ ހަފްތާއެއްހައި ދުވަސް ކުރިން ފެށިގެން މަތިވެރީގައި ކޮވިޑް ފެތުރެން ފަށައި 50 އިންސައްތައަށް ވުރެ ގިނަ ގެތައް ކަރަންޓީނު ކުރިއެވެ. އެ ރަށުގައި ދިރިއުޅޭ 700 މީހުންގެ ތެރެއިން 170 މީހުން މިހާރު ވަނީ ކޮވިޑަށް ފައްސިވެފައެވެ. މި ހާލަތުގައި ބަލި ކޮންޓްރޯލްކުރަން އެންމެ ރައްކާތެރި ގޮތަކީ، އެކަހެރިވެ ތިބުން ކަމަށް އެ ރަށުގެ ޓާސްކް ފޯހާއި ކައުންސިލުން ވެސް އޮތީ މަތިވެރީގެ ރައްޔިތުންނަށް އަންގައިފައެވެ.
Ads by STO
