ކޮވިޑް-19: މަތިވެރިން އިތުރު 9 މީހުން ފައްސިވެ، ޖުމްލަ އަދަދު 191އަށް އަރައިފި
އއ. މަތިވެރިން އިތުރު 9 މީހަކު ކޮވިޑް-19 އަށް ފައްސިވެ، ޖުމްލަ އަދަދު 191އަށް އަރައިފިއެވެ.
މަތިވެރި ކައުންސިލުގެ ރައީސް އިސްމާއިލް އާތިފް "ދެން" އަށް މައުލޫމާތު ދެއްވަމުން ވިދާޅުވީ، އަދި ނަތީޖާ ލިބިފައި މިވަނީ ރޭ ނޫން ކުރީ ރޭ ނެގި ސާމްޕަލްތަކުގެ ކަމަށާއި ރޭގައި ނެގި ސާމްޕަލްތަކުގެ ނަތީޖާ އަދި ނުލިބޭ ކަމަށެވެ.
މިހާރު އެރަށުގައި ކޮވިޑް-19 އަށް ފައްސިވީ ޖުމްލަ އަދަދު 191 އަށް އަރާފައިވާއިރު އެކްޓިވް ކޭސްގެ ގޮތުގައި 180 މީހުން އެބަތިއްބެވެ. އަދި އެ ރަށުން މިހާތަނަށް މި ބަލިން ފަސޭހަވެފައި ވަނީ 11 މީހުންނެވެ.
މަތިވެރިން މިހާތަނަށް ފައްސިވެފައި ވަނީ 172 ދިވެހީންނާއި ބަނގްލަދޭޝްގެ 4 މީހަކާއި އިންޑިއާގެ 3 މީހަކާއި އަދި ސާބިޔާގެ އެކަކެވެ.
އއ. މަތިވެރީގައި ކޮވިޑް-19 ފެތުރެން ފަށައިފައި ވަނީ އިންޑިއާއިން އެ ރަށަށް ދިޔަ ފަތުރުވެރިއެއްގެ ސަބަބުން ކަމަށް އެރަށު ކައުންސިލްގެ ރައީސް އާތިފް ވަނީ ތުހުމަތު ކުރައްވައިފައެވެ.
"ދެން" އަށް މައުލޫމާތު ދެއްވަމުން އާތިފް ވިދާޅުވީ، އެރަށުން އެންމެ ފުރަތަމަ ބައްޔަށް ފައްސިވެފައި ވަނީ އިންޑިއާގެ ފަތުރުވެރިއެއް ކަމަށާއި އެ މީހާގެ ނަތީޖާ ލިބުނުއިރު އޭނާ ރަށުން ފުރައިގެން ގޮސްފި ކަމަށެވެ.
އެ ފަތުރުވެރިޔާއާ ކޮންޓެކްޓް ވި އިންޑިއާގެ 4 ރައްޔިތުންނާއި، އޭނާ ހުރި ގެސްޓްހައުސްގައި މަސައްކަތް ކުރާ މީހަކުވެސް ބައްޔަށް ފައްސިވެފައިވާ ކަމަށް އާތިފު ވިދާޅުވެފައިވެއެވެ.
އިންޑިއާ މީހާގެ ކްލަސްޓަރގެ އިތުރުން، ބޮޑުފުޅުދުއަށް ދިޔަ މީހަކު ޕޮޒިޓިވްވެ އުފެދުނު ކްލަސްޓާއެއް ވެސް އެ ރަށުގައި އެބައުޅޭ ކަމަށް އާތިފް ވިދާޅުވިއެވެ.
