އުމުރުން 7 އަހަރުގެ މި ކުއްޖާ އާއިލާއަށް އެހީވާން ވިއްކަން ފެށީ އަމިއްލަ ކުރެހުންތަކެއް
އުމުރުން ގާތްގަނޑަކަށް ހަ އަހަރުގެ މުސްލިމް ކުޑަކުޑަ ފިރިހެން ކުއްޖަކު، އެންމެންގެ ހިތްތައް ލޯތްބާއި ހައިރާންކަމުން ފުރާލައިފިއެވެ. ޖިއްދާގެ ފާލަމެއްގެ ދަށުގައި އިނދެ އޭނާ ކުރަމުން ދިޔައީ ވަރަށް ވެސް މާތް ކަމެކެވެ.
މީހުން ހިނގާ ފަޅީގައި ފެހި ކުލައިގެ ބޮޑު ފޮތިގަނޑެއް އަޅާފައި އޭނާގެ އަމިއްލަ ކުރެހުންތަކެއް ފޮތިގަނޑު މަތީގައި ފަތުރާލައިގެން އިނެވެ.
އޭނާ އެ ކުރެހުންތައް ފަތުރައިލީ މީހުންނަށް އެތަކެތި ހަމައެކަނި ދައްކާލާކަށް ނޫނެވެ. އޭނާގެ އާއިލާގެ ޚަރަދުބަރަދު ބަލަހައްޓަން އެހީތެރިވުމަށް އަމިއްލައަށް ފައިސާ ހޯދަން އެ ކުރެހުންތައް ވިއްކުމަށްޓަކައެވެ. އޭނާ ބުނީ އަމިއްލަ މަސައްކަތުން ފައިސާ ހޯދުމަކީ އަޅުގަނޑުމެންގެ މާތް ނަބިއްޔާ މުޙައްމަދު صلى الله عليه وسلم ވެސް ކަންތައް ކުރެއްވި ގޮތް ކަމަށެވެ.
ކުރެހުންތަކަށް ބަލާލާއިރު ހުރީ ހަމަ އެ އުމުރުގެ ކުދިން ކުރަހާ ފަދަ އާދައިގެ ކުރެހުންތަކެކެވެ. ތަފާތު އެކި ވައްތަރުގެ ކުދި ގެތަކާއި މަންޒަރުތަކާއި ޖަނަވާރުތަކުގެ ތަސްވީރު ކުރަހާފައިވާއިރު އެއްވެސް މީހަކު އެކުރެހުންތަކަށް ފާޑެއް ނުކިޔައެވެ. އެންމެންވެސް ތިބީ އެ ތުއްތު ކުއްޖާގެ ހިތްވަރާއި އަޒުމް ވަރުގަދަކަމުން އާޝޯޚުވެފައެވެ. އަދި އެ ކުއްޖާގެ ހާލަތާ މެދު ހަމްދަރުދީ ވެސް ވެފައެވެ. ސަލާން ނުޖަހާ އަމިއްލަ މަސައްކަތުން ފައިސާ ހޯދަން ނިކުތުމުން އެންމެން ވެސް އެކުޑަ ކުއްޖާއަށް ސަނާ ކިއެވެ.
ޕްރޮފެސަރ ސާމިރާ އަބޫ ޝަމަތު ބުނެފައި ވަނީ ކުޑަކުއްޖެއް ކަމުގައި ވިޔަސް ފިރިހެނަކަށް ވުމުގެ ޒިންމާ އެ ކުއްޖާ ދައްކުވައިދިން ކަމަށާއި އެއީ ވަރަށް ރަނގަޅު ފިލާވަޅެއް ކަމުގައެވެ. ގިނަ ބަޔަކު ބޭނުން ވަނީ އެ ކުއްޖާ އެމީހުންގާތު ބަހައްޓައިގެން ބަލަހައްޓާށެވެ.
"އިސްލާމިކް އިންފޮމޭޝަން"އަށް މައުލޫމާތު ދެމުން ސައުދީ އެސޯސިއޭޝަން ފޮ އާޓްސް އެންޑް ކަލްޗަރ ގެ ރައީސް ސުލްތާން އަލް-ބަޒާއީ ވަނީ ކުރެހުމުގެ އިތުރު ފުރުސަތުތައް އެކުއްޖާއަށް ހުށަހަޅާފައެވެ. އަދި އެ ކުއްޖާގެ އާއިލާގެ މާލީ ހާލަތުގައި ވެސް އެހީތެރިވެދޭނެ ކަމުގައި ސުލްތާން ބުނެފައިވެއެވެ.
ޙެޔޮދު